தான் பொழுதெலாம் கவிதை எழுதுவதைச்சிலர் ஏளனமாய்ப் பார்க்கவும் பேசவும் செய்வதாக ஒரு கவிஞர் குறைப்பட்டுக்கொண்டபோது.....

காசுக்காய் நாளுந்தம்

கால்கடுக்கப் போயுழைப்போர்

நாசுக்காய்ச் சாடுவதும்

நன்மைக்கே! - ஆசுகவி

தீர்க்குமோ தாகத்தை?

தீய்க்குமோ வன்பசியை?

பேர்க்குமோ ஏழ்மையை?

பேசு!

==

புலமையும் வறுமையும் ஒட்டிப்பிறந்த இரட்டைக்குழந்தைகள். பொருள்படைத்தோர் என்னைப்போல் எழுதவும் ஏலுமோ? என அவர் வினவியபோது...

வாதம் புரியும்வாய்

வன்பசி உற்றக்கால்

சாதம் தனைத்தேடித்

தான்தவிக்கும்; - காத

தொலைவோ புலமைக்கும்

சூழ்பொருட்கும்? இங்கே

இலையோநம் வைரமுத்து?

எண்!

==

வைரமுத்து ஓர் 'இலக்கியத் திருடன்' - என அந்நபர் சாடியபோது...

சங்க இலக்கியத்தின்

சாறு பிழிந்தெடுத்(து)

இங்கு வழங்கல்

இழிவில்லை; - திங்களது

செங்கதிர் சிந்தும்

செழுமொளியைச் சேர்தெடுத்துக்

கங்குலில் ஈதல்

கடன்!

==

தொன்மக்கருத்துகளை எழுதுதல் தவறில்லை. அவற்றைப் பாட்டில் எடுத்தாளுவதை ஏற்கமுடியாது - என அந்நபர் மறுப்புரைத்தபோது....

ஏட்டில் புலவர்

இயம்பிய கற்பனையைப்

பாட்டில் கவியரசன்

பாய்ச்சலையா? - நாட்டில்

இவர்க்குப்போல் மிக்க

இரசிகர் கூட்டம்

எவர்க்குண்டு நண்பா!

இயம்பு!

==

எல்லா உணர்ச்சிகளும்:

8Senthil Kumar, பாவலர் அபி சத்தி மற்றும் 6 பேர்