வியாழன், 5 செப்டம்பர், 2013

காதலமைப்புச் சட்டம் 143-ன் கீழ்! (5)


நீ கோபத்தில் உதிர்க்கும்
ஒவ்வொரு சொல்லும்
ஆயுத சொல்லாகின்றன

நீ ‘ம்’ கொட்டும்போது
வெளிப்படும் மெய்யெழுத்தும்
உயிரெழுத்தாகி விடுகிறது

புதன், 4 செப்டம்பர், 2013

காதலமைப்புச் சட்டம் 143-ன் கீழ்! (4)


நாணமே
நாணப்பட்டுக் கொண்டது

நீ
நாணப்படும் போது

செவ்வாய், 3 செப்டம்பர், 2013

காதலமைப்புச் சட்டம் 143-ன் கீழ்! (3)


நீ நகைத்தாய்
நகைப்புக்கே வியப்பு வந்துவிட்டது
இதற்குமுன்
இத்தனை அழகாகத் தன்னை யாரும்
பிரதிபலித்ததில்லையே என்று

திங்கள், 2 செப்டம்பர், 2013

காதலமைப்புச் சட்டம் 143-ன் கீழ்! (2)


எல்லோருக்கும் பிரச்சினை
போர்க்கொடி தூக்கினார்கள்

உனக்கொரு பிரச்சினை
போரே
கொடி தூக்கிக்கொண்டு வந்துவிட்டது

ஞாயிறு, 1 செப்டம்பர், 2013

காதலமைப்புச் சட்டம் 143-ன் கீழ்! (1)


என் தெருவுக்கு வந்துசென்றாய்
இருவேறு கருத்தைச் சொல்கிறார்கள்
தென்றல் அடித்ததாகவும்
புயல் தவழ்ந்ததாகவும்

வெள்ளி, 30 ஆகஸ்ட், 2013

கடவுள் கேட்டால்?




கற்பிழந்து போன கடவுள்கள் எல்லாரும்
இப்பொழுது வந்தே இடங்கேட்டால்? –இப்புவியில்
மூன்றடி மண்கேட்டு முற்றும் கவர்ந்தகதை
ஈண்டறி யோமோ இயம்பு!

ஞாயிறு, 25 ஆகஸ்ட், 2013

உயிரச்சு போயிற் றுடைந்து!

நடைபோட்டாள் நங்கை நடனமிடுங் கண்ணால்
எடைபோட்டாள் என்னை எடுத்து!

கண்தான் கருவி; பருவம் களமாம்;அப்
பெண்செயும்போர்க் கீடோ பிற!

மோதல் முகவரி; முன்நின் றவளனுப்பும்
காதல் கடுதாசி கண்!

விழிமுதலாய் வைத்து விரித்தாள் கடையை;
மொழியிழந்தேன் காதல் முதிர்ந்து!

விழுத்தினாள் வீழ்ந்தேன் விழிதனில்; காதல்
அழுத்தினால் என்னாம் அகம்?

மயிற்பீலி காதல்; சுமந்தேன் சுமந்தேன்
உயிரச்சு போயிற் றுடைந்து!

கண்ணீரில் மூழ்கியென் கண்சாகும்; தன்காதல்
பெண்நெஞ்சின் உள்மறைக்கும் போது!

வற்றாக் கடலாய் வளரும் விழியிரண்டில்
ஒற்றைப் படகுன் உரு!

செவ்வாய், 20 ஆகஸ்ட், 2013

அமுதன் குறள்! 6

செம்மை மனத்தர் சிவனார் அடிமுடியை
எம்பிக் குதிப்பதனால் எட்டு! (41)

இழந்தால் திரும்பா திளமைவிளை யாடு
குழந்தைக் குழுசேர்த்துக் கொண்டு! (42)

கிணற்றுத் தவளைபோல் தத்திக் கடல்போய்
மணல்வீடு கட்டி மகிழ்! (43)

வாலாட்டும் பல்நிறந்துப் பட்டத்தை வானேற்றி
நூலாட்டிக் கைகொட்டி நோக்கு! (44)

எம்பிக் குதித்தபடி ஏந்தஉன் கைசுற்றும்
பம்பரம் ஆடப் பழகு! (45)

குதிரைத்தாண் டாடுபுலி கிட்டிப்புள் போன்ற
முதிர்ந்த விளையாட்டுள் மூழ்கு! (46)

விடுத்த(அ)ம்பு போலே விரைந்துபின் மீளும்
சடுகு(டு)ஆட் டத்தைத் தழுவு! (47)

விட்டுக் கொடுத்து விளையாடு நன்னெஞ்சால்
தொட்டுக் கலந்தின்பம் துய்! (48)

களம்புகுந் தாட கருத்தைக் கவரும்
சிலம்பமும் வாளும் சுழற்று! (49)

ஏறு தழுவுதல் இன்தமிழர் பண்பாடாம்
சீறுமெது கண்டும் சிரி! (50)