வெண்பா பஃபே லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி
வெண்பா பஃபே லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வெள்ளி, 20 நவம்பர், 2026

 

அனாயாச மாக அசரா(து) அடிப்பேன்

சுனாமியி லேயே சுவிம்மிங்; – பினாமி

எனக்குக் குபேரன்; எலான்மஸ்க்கும் என்முன்

தனத்தில் குசேலனே தான்! 1

 

குண்டலத்தைப் பிய்த்துக் கொடுத்தகர்ணன் போலவிண்மீன்

மண்டலத்தைப் பேர்த்தளிப்பேன் மன்பதைக்குப் – பெண்டகனின்

ஆண்டு செலவென் அரைநாள் செலவினைத்

தாண்டியதாய் இல்லை தரவு! 2

 

டிபன்செல வாகும் டிரில்லியன்; டிப்ஸாய்

உபசெல வாகும் உடுக்கள்; – சுப‍ப்பொழுதில்

மில்க்டீ பருகிட மில்கி வே போய்வருவேன்

ஹல்க்குமே என்பலத்தில் ஹாஃப்! 3

 

அட்டர்ஃப்ளாப் ஆகாமல் அண்டத்தை நான்சுற்ற

பெட்டர்ஃப்ளைட் ஆகாதோ பட்டர்ஃப்ளை? – லெட்டர்பேட்

நான்தந்தால் நாசா நமஸ்காரம் பண்ணாதோ

வான்தந்தேன் முன்புவியில் வைத்து! 4

 

எந்த அழகியரும் என்னைவந்து சந்திக்கும்

அந்தப் புரமாகும் அந்திநிலா; – எந்தனிடம்

உத்தரவு பெற்றே உயர்த்துவான் வில்லம்பைப்

பித்தேற்றும் காம பிரான்! 5

 

அண்டர் கடைந்த அமிழ்தில்வாய் கொப்பளித்துக்

கொண்டலில்நீர் மோந்து குளியலிட்டு – வண்டுதொடாப்

பூமடியில் சாய்ந்து புளூட்டோவில் நாள்கழிக்கச்

சாமங்கள் சொல்லும் சபாஷ்! 6

 

இக்கட‍உள் ளோமென்று இயம்பிநிதம் என்பொருட்டே

முக்கடவுள் செய்கின்றார் முத்தொழில்; – அக்கலையால்

கொட்டும் வருவாயைக் கொட்ட இடமின்றித்

துட்டில் குளிர்காய்வேன் சுட்டு! 7

 

ஸ்கைடைவ் அடித்துக் கசந்தேன்; பிளாக்ஹோலில்

லைவ்டைவ் அடித்து ரகளைசெய்வேன்; – மை டைவில்

நெஞ்சைப் பறிகொடுத்து நிற்பர் ரதி,ரம்பை

துஞ்சலெனும் தூக்கம் தொலைத்து! 8

 

மூழ்கிய டைட்டானிக் முற்றத்தில் முக்குளித்து

ஆழ்ந்தொரு’நைட் டானிக்’ அருந்திடலாம்; – வாழ்ந்திடத்தான்

வாழ்க்கை எனப்புரிந்து வைத்தோர் வருக‍என்பின்

ஊழ்க்கை நினைவை ஒழித்து! 9

 

ஏழு பெருக்கல் இருபத்து நான்கினிலும்

சூழுவதெல் லாமும் சுகம்சுகமே! - வாழுலகம்

பூஜ்ஜியம் என்றே புலம்பாது உனக்கென‍ஓர்

ராஜ்ஜியம் கட்டி ரசி! 10