காதலமைப்புச் சட்டம் 143-ன் கீழ்! (8)

உலகின் எல்லாப் பொருள்களின் நிழலும்

தரையில் விழுகையில்

உன் ஒருத்தியின் நிழல்மட்டும்

வானில் விழுகிறது

அதைத்தான் இவர்கள்

நிலா என்கிறார்கள்

காதலமைப்புச் சட்டம் 143-ன் கீழ்! (7)

அப்படி என்ன

சிரிப்பு வேண்டிக் கிடக்கிறது?

என்கிறாள்

உன் அன்னை

உன்னிடம்

சிரிப்பு வேண்டிக் கிடப்பது

தெரியாமல்…

காதலமைப்புச் சட்டம் 143-ன் கீழ்! (6)

மனிதனுக்குப் போட்டியாய்
கடவுளே எழுப்பிய
உலக அதிசயம்
நீ

யார்கண்ணும் பட்டுவிடக்கூடாது

என்று

பிரம்மனே வைத்த

திருஷ்டிப் போட்டு

உன் கன்னத்து மச்சம்

காதலமைப்புச் சட்டம் 143-ன் கீழ்! (5)

நீ கோபத்தில் உதிர்க்கும்
ஒவ்வொரு சொல்லும்
ஆயுத சொல்லாகின்றன

நீ ‘ம்’ கொட்டும்போது
வெளிப்படும் மெய்யெழுத்தும்
உயிரெழுத்தாகி விடுகிறது

காதலமைப்புச் சட்டம் 143-ன் கீழ்! (4)

நாணமே

நாணப்பட்டுக் கொண்டது

நீ

நாணப்படும் போது

காதலமைப்புச் சட்டம் 143-ன் கீழ்! (3)

நீ நகைத்தாய்

நகைப்புக்கே வியப்பு வந்துவிட்டது

இதற்குமுன்

இத்தனை அழகாகத் தன்னை யாரும்

பிரதிபலித்ததில்லையே என்று