பூங்கா!
நகரத் திரையே
சுவர்க்கம் போலே
நகரத் திடையே பூங்காக்கள் – அதில்
சிரிக்கும் பூக்களைத்
திருடா திருக்கத்
திறனுடன் காக்கும் கூர்க்காக்கள்
சின்னப் பூக்கள்
சிரிக்கும் அழகில்
சிந்தும் தேனின் சுவைகண்டு – மிகக்
கன்னம் வைத்துக்
கவின்மலர்த் தேனைக்
கவர்ந்து போகுது பொன்வண்டு
திங்கள் தவழும்
தென்றல் உலவும்
சிவந்த மாலைப் பொழுதினிலே – மணம்
தங்கள் பூங்கா
தன்னைச் சார்ந்து
தங்கிக் களிப்பார் தனிமையிலே
விரித்த பாய்போல்
விளங்கும் பாதை
விளிம்பில் இருக்கை நிறைந்திருக்கும் – அதில்
இருக்கும் மனம்விடுத்து
இடையிடை மறைவில்
இருக்கும் வகையால் உளம்களிக்கும்
அமைதி தேடி
அலையும் கூட்டம்
அமர்ந்து பொழுதைக் கழிக்கிறது – அதில்
அமைதி தேட
அமைத்த பூங்கா
அமைதி இழந்து தவிக்கிறது
மாலை வந்தால்
மக்கள் வந்து
மலிவார் அமைதி பறிபோகும் – சிலர்
மாலை வந்தால்
மனத்துயர் விடுத்து
மறுபடிக் கிளம்ப இரவாகும்
பின்னல் தலையில்
பிஞ்சுப் பூக்கள்
பிறங்கப் பூங்கா சிரிக்கிறது – கவின்
புன்னகை சிந்தும்
பூக்களை மெல்லப்
பூவிரல் நாடிப் பறிக்கிறது
சிரித்து மகிழ்ந்து
சிலபொழு திருந்து
செல்லவே சிலபேர் வருகின்றார் – உளம்
வருத்தும் நினைவின்
வளர்முளை கிள்ளி
மறக்கச் சிலபேர் வருகின்றார்
போகாப் பொழுதைப்
போக்கித் தொலைக்கப்
பூங்கா சேரும் சிலருண்டு – உடல்
வாகாய் விளங்க
வடிநற் காற்று
வாங்க வருவார் சிலருண்டு!
முந்தியை விரித்து
மூலையில் படுத்து
மூழ்கிடும் கனவில் ஒருகூட்டம் – அட
குந்திய இடத்தில்
கொஞ்சிக் குலவிக்
குடித்தனம் நடத்தும் ஒருகூட்டம்!
ஒவ்வொரு மரமும்
ஒவ்வொரு கல்லென
உணர்ந்து மரச்சிலை அவர்வடித்தால் – அதில்
அவ்வவர் துணையொடு
அண்டிக் களித்து
அனைத்துக் கலைகளும் இவர்படிப்பார்!
கொணர்ந்த பொருளைக்
குதப்பித் தின்று
குப்பை ஆக்கச் சிலர்வருவார் – மலர்
மணக்கும் பூங்கா
மணத்தைக் குளைக்க
வாயில் புகையொடு சிலர்வருவார்!
நகைக்கும் பூங்கா
நாடி மகிழ்ந்து
நடையைக் கட்டல் பீடாகும் – சுருள்
புகைக்கும் அரங்கெனப்
புகைத்தால் பூங்கா
புகழ்தனை இழந்து காடாகும்!
விழுப்ப மெல்லாம்
விளங்கும் ஒழுக்கம்
வீரிட் டழுவுது பூங்காவில் – இந்த
ஒழுக்கக் குறைகள்
ஒழிந்து விழுப்பம்
உயர்ந்து விளங்க யார்காவல்?
சீருடை அணிந்த
சிறார்கள் போலே
சிரிக்கும் பூங்கா வெடிக்கிறது – பெரும்
பேருடை தன்னின்
பெரும்புகழ் குறைத்தல்
பிழையெனச் சாடி முடிக்கிறது!
கருத்துகள் இல்லை:
கருத்துரையிடுக