மூட்டத்தைத் தான்போட்டு முன்னாடி குந்திடணும்;

சூட்டைத்தான் ஏற்றிச் சுகம்பெறணும்; - வாட்டிக்

குறைச்சாத்தான் போச்சு குளிரதிகம் ஆச்சு

விறைச்சித்தான் போச்சு விரல்!

 

போர்வைக்குள் தப்பிக்கப் போயொளிந்த போதினிலும்

தீர்வில்லை போனேனே சில்லிட்டு; - மார்கழியில்

மண்ணும் குளிருமாம் மாமன் குளிருகிறேன்

பெண்நீ மருந்திப் பிணிக்கு!

 

மகளொரு பக்கம் மகனொரு பக்கம்

திகழ்குளிரில் தோளணைத்துத் தூங்க - நிகழ்வதைநான்

தள்ளிப் படுத்துத் தலைசொறிந்து நோட்டமிடக்

கள்ளி சிரிக்கின்றாள் கண்டு!

 

போர்வை தலையணையே போதும் எனஉறங்க

யார்நான்? இரும்பிலான எந்திரமா? - கார்காலக்

கூதலுக்குத் தோதவள் கூடலே; உள்ளூறும்

காதலுக்குச் செம்மாங் கனி!

 

வெந்நீரைக் கேட்டு வெடவெடக்கும்; பாழ்பச்சைத்

தண்ணீர்க்குத் தாடை தடதடக்கும்; - பெண்ணேநீ

காய்ந்த விறகெரித்துக் காய்ச்சிக் கதகதப்பை

ஓய்ந்த உடம்புக்கே ஊத்து!

 

துண்டெடுத்து வாடி துவட்ட; குளிப்பதைக்

கண்டெடுத்த தெந்த கழிசடை; - மண்டும்

தவளைச் சொறிபோல் தலைகால் வரைக்கும்

குவளை மலர்போல் குளிர்க்கு!

 

மயிர்க்கால்கள் நிற்கும், வயல்மேற் பரப்பில்

பயிர்க்கால்கள் நிற்கும் பவிசில்; - தயிர்சாதம்

மிக்கப் பகைகுளிர்க்கு; வேக்காட்டில் முங்கிமுங்கி

முக்குளித்த இட்லிபோதும் மூன்று!

 

ஆவி பறக்கும்டீ ஆகக் குளிருக்குச்

சாவு மணியடிக்கச் சம்மதிக்கும் - பாவிமகள்

கையிலே மாவெடுத்துக் காலையிலே போடுகிறாள்

தையிலே மாக்கோலத் தை!

 

10/1/2024