அகரம்.அமுதா

படப்பா! 39

2012-01-31T11:56:00.000+05:30

நான்
உன்னைப்பற்றிக்
கவிதை சொல்வது
கவிதைக்குக்
கவிதையால் உரைசொல்வது
போன்றிருக்கிறது

படப்பா! 38

2012-01-27T10:31:00.000+05:30

குயில்

கூடு கட்டாதா?

நீ

கொண்டை போடுவதைப்

பார்க்காத எவனோ

பழுதான

பரப்புரை பண்ணியிருக்கின்றான்

படப்பா! 37

2012-01-24T10:07:00.000+05:30

விடிகிற போதே

இருட்டிவிடிகிறது எனக்கு

எங்கோ பார்த்தபடி

என்னைக்

கடந்து செல்கிறாய்

நீ

எழுச்சி வணக்க மாலையும் "கரிகாலன் ஈற்றெடுப்பு" நூல் வெளியீடும்!

2012-01-14T18:01:00.003+05:30

மூத்த தளபதி கேணல் கிட்டு உட்பட இம்மாததில் வீரகாவியமான மாவீரர்களது நினைவுவணக்க மாலையும், "கரிகாலன் ஈற்றெடுப்பு" நூல் வெளியீடும்.

மூத்த தளபதியும் வரலாற்று நாயகனுமான கேணல் கிட்டு உட்பட இம்மாததில் வீரகாவியமான அனைத்து மாவீரர்களையும் நினைவுகொள்ளும் நினைவுவணக்க மாலை லண்டனில் நடைபெறவுள்ளது.

22.01.2012 ஞாயிர்றுக்கிழமை மாலை 5:30 மணி முதல் மாலை 9:30 மணிவரை Eastham, Barking, London, E6 2RP எனும் முகவரியில் அமைந்துள்ள Eastham TOWN HALL மண்டபத்தில் நடைபெறவுள்ள இந்த நிகழ்வில் "கரிகாலன் ஈற்றெடுப்பு" எனும் தேசியத் தலைவர் தொடர்பான கவிதை நூலும், மேலும் மூன்று ஒலிப் பேழைகளும் வெளியிட்டு வைக்கப்படவுள்ளது.

இந்த நிகழ்வில் பிரித்தானியா வாழ் தமிழ்மக்களை கலந்துகொண்டு மண்னுள்ளும், எம் மனங்களினுள்ளும் வித்தாகி வாழும் மாவீரர்களுக்கு தமது மலர் வணக்கதினை செலுத்துமாறு கேட்டுக்கொள்கின்றோம்.

இம் மாதத்தில் வீரச்சாவைத் தழுவிய மாவீரர்களது உறவினர்கள், மற்றும் உரித்துடையோர் ஐக்கிய இராட்சியத்தில் வசிப்பவர்களாக இருந்தால் 0208 733 8203 எனும் தொலைபேசி இலக்கத்தினூடாகவோ அல்லது info@tnrf.co.uk எனும் மின்னஞ்சலூடாகவோ தொடர்புகொள்ளுமாறு கேட்டுக்கொள்கின்றோம்.

படப்பா! 36

2012-01-12T09:49:00.000+05:30

உடைப்பதா?

பத்திரப்படுத்துவதா?

நீயே முடிவெடு

தாவும் மந்தியிடமிருந்து

தவறிவிழுந்த குட்டியை

மீண்டும்

தாய்க்குரங்கு எப்படி

தூக்கிச் சுமப்பதில்லையோ

அப்படி

அந்த எனது

முந்நாள் இதயத்தைத்

தூக்கிச்சுமக்கச் சம்மதமில்லைஎனக்கு

என் இதயத்தோடு சேர்த்து

இரண்டு இதயங்கள் இருக்கும்போதும்

இதயமில்லாதவளாய்

உன்னால்

இருக்கமுடிகிறபோது

இதயமே இல்லாமல்

என்னால்

வாழமுடியாதா என்ன?

படப்பா! 35

2012-01-09T09:38:00.000+05:30

பாறையைத்

தழுவிக்கொண்டோடுகிறது

தண்ணீர்

உருட்டிக்கொண்டோடுகிறது

வெள்ளம்

நீ

காதலை ஏவித்

என்னைத் தழுவியும்

உன்னையே ஏவி

உருட்டியும் விளையாடுகிறாய்

பாறை தூளானால்

மணலாகும்

என்னைத் தூளாக்கிக்

கைநிறைய அள்ளிக்கொள்கிறாய்

கவிதைகளை

படப்பா! 34

2012-01-07T20:35:00.000+05:30

நீ புட்டில்
நான் கோப்பை

பார்வையை
என்மீது கவிழ்க்கிறாய்

கோப்பை நிரம்பிக்
காதல் வழிகிறது

படப்பா! 33

2011-11-27T13:33:00.000+05:30

இருக்கிற ஒரே
இதயத்தையும் கொடுக்கிறோமே
என்பதல்ல
என் வருத்தம்

உனக்குக் கொடுப்பதற்கு
ஒரேஒரு
இதயம்தானே இருக்கிறது
என்பதுதான்
என் வருத்தமெல்லாம்

படப்பா! 32

2011-11-25T13:12:00.000+05:30

வீசத் தயாராயிரு
பாசப் பார்வையை
அல்லது
பாசக் கயிற்றையாவது

படப்பா! 31

2011-11-23T12:57:00.000+05:30

விருப்பப் பார்வை
வீசவில்லை என்றாலும்
பரவாயில்லை
வெறுப்புப் பார்வையாவது
வீசிவிட்டுப் போ

நீ என்னைப்
பார்த்துவிட்டதாக
ஊர்முழுக்கத் தம்பட்டம்
அடிக்க வேண்டும்
எனக்கு

படப்பா! 30

2011-11-21T12:45:00.000+05:30

தின்றால் கொல்லி
சயனைடு

பார்த்தால் கொல்லி
நீ

படப்பா! 29

2011-11-19T12:36:00.000+05:30

உஸ்ஸிற்குப் பின்தான்
கிஸ் போலும்
புயலுக்குப்பின்
அமைதிபோல

படப்பா! 28

2011-11-17T12:27:00.000+05:30

1331 -வது
குறள்தானே
உன்
உதடுகள்

படப்பா! 27

2011-11-15T12:14:00.000+05:30

சாட்சியே இல்லாமல்
கொலைசெய்வது எப்படி
எனக்
கற்றுத்தரும்
பல்கலைக் கழகம் நீ

இரண்டு விழிகளுமே
பயிற்சியாளர்கள்

படப்பா! 26

2011-11-13T12:03:00.000+05:30

நீ
வில்போல்
வளைவதில்
வில்லுக்குப் பெருமைதான்

உன்னைப்போல்
வளையமுடிவதில்லையே
என்றுதான்
வறுத்தம் கொள்கிறது

படப்பா! 25

2011-11-11T11:50:00.000+05:30

சிலர்
வெட்டிப் பேசுவர்
சிலர்
வெட்டியாகப் பேசுவர்
உன்னால் மட்டுமே
முடிகிறது
(விழியால்)
வெட்டிவெட்டிப் பேச

படப்பா! 24

2011-11-09T11:39:00.000+05:30

முக்தி பெறட்டும்
முத்தமிழ்
மௌனம் களை

படப்பா! 23

2011-11-07T09:35:00.000+05:30

உனக்கு
இடைதான்
இல்லை என
நினைத்திருந்தேன்
இதயமும்
இல்லை போலும்

இருந்திருந்தால்
இதயத்தில் ஓரிடம்
எனக்காக
ஒதுக்கியிருக்க மாட்டாயா

படப்பா! 22

2011-11-05T13:49:00.000+05:30

வடக்கு
வளர்கிறது
தெற்கு
தேய்கிறது
என்பது
எத்தனை உண்மையோ
அத்தனை உண்மை

உன்
மார்பு வளர்வதும்
இடை தேய்வதும்

படப்பா! 21

2011-11-05T09:12:00.001+05:30

ஒய்யாரமாக
சாய்ந்து நிற்கும்
உன்னை விட்டுவிட்டு
ஒருவாறு சாய்ந்திருக்கும்
பைசா கோபுரத்தைத்
தேர்ந்தெடுத்திருக்கிறார்களே
உலக அதிசயமாக

தேசிய சாலை!

2011-10-16T18:35:00.001+05:30

கன்னிநான் தேசியச்சால

கார்கள்பல ஓடுஞ்சால

உங்கிட்டக் காரிருந்தா

கலந்துகோ ரேஸுல

(கன்னிநான்)

நேர்சால எந்தன் மூக்கு

உதடுகள் ஸ்பீடு பிரேக்கு

ஒழுங்காக ஓட்டுனீண்ணா

உடையாது உந்தன் மூக்கு

கன்னங்கள் வழுக்குச்சால

கண்களில் சந்திக்கும்

சரிவேகம் போகும்காரே

சிக்னலில் முந்திக்கும்

(கன்னிநான்)

மேம்பால மார்புங்க

மெதுவாக ஏறுங்க

சரிவுல சருக்கிடாமே

சமத்தாக ஓட்டுங்க

கைநெடுஞ் சாலைங்க

கருத்தாகப் போய்வாங்க

வெளியேற விரல்கள்பத்தும்

வெளியேற்ற சாலைங்க

(கன்னிநான்)

விரைவுச் சாலதோள்கள்

விருப்பம்போல் ஓட்டலாம்

விடிகிற வரைக்குமங்கே

வெற்றிக்கொடி நாட்டலாம்

தொப்பூழே ரௌண்டானா

அதில்பலர் கவுந்தானாம்

மப்பிலே காரஓட்டி

மல்லாந்து கிடந்தானாம்

(கன்னிநான்)

இடையோட இருபுறமும்

இருக்குது வளைவுங்க

அதிவேகம் போகுங்கார்கள்

அதில்நிலை குளையுங்க

கால்களே ஒருவழிச்சால

தொடைரெண்டும் இருவழிச்சால

அங்கேயோர் ‘யு டர்ண்’போட்டா

அங்குண்டு அழகியசோல

(கன்னிநான்)

மேடுண்டு பள்ளமுண்டு

வளைவுண்டு நெலிவுமுண்டு

விதவித மானகார்கள்

விரைந்திட இடமும்உண்டு

விதியில்லாச் சாலநான்

விளயாட வாரலாம்

பையிலே பணமிருந்தா

பலரௌவுண்டு போகலாம்!

(கன்னிநான்)

மாமன் வந்தான்!

2011-10-10T18:31:00.003+05:30

ஆண்:- ஏற்றிய நெய்விளக் கெரிகிற வேளையில்

காமன் வந்தான் –என்னைக்

காண வந்தான்

பெண்:- வந்த

காமனும் கைத்திறன் காட்டிய வேளையில்

மாமன் வந்தான் –நடு

சாமம் வந்தான்

ஆண்:- விடச்சொல்லிக் கேட்குது சின்னஇடை –வந்து

தொடச்சொல்லித் தூண்டுது அன்னநடை

பெண்:- தடைசொல்லப் பார்க்குது நெஞ்சுக்குழி –முத்தம்

இடச்சொல்லிக் கேட்குது கன்னக்குழி

(ஏற்றிய…)

பெண்:- உன்னிடம் தந்தது ஓரளவு –இன்னும்

உள்ளது என்னிடம் ஊரளவு

ஆண்:- அத்தனை யும்எனக் குரிமையடி –மெல்ல

அள்ளிட நாணுது இளையகொடி

(ஏற்றிய…)

மனுசன நெனச்சே சிரிக்குறேன்

2011-10-06T18:28:00.002+05:30

மனுசன நெனச்சே சிரிக்குறேன் –அவன்

மனசுல உள்ளத கணிக்குறேன்!

நீதி நேர்மய நெனக்கல –சரி

பாதி பொண்ணுண்ணு மதிக்கல

கருத்துல தெளிவில்ல கண்மண் தெரியல

கால்போற போக்கு சரியில்ல –உடல்

ஆட்டங் கண்டா அப்போது தான்டா

ஆண்டவன் இருப்பது தெரியுது –அவன்

அருள்மனம் வேண்டி உருகுது! -இந்த

(மனுசன)

எளமத் திமிருல திரியுறான் –அவன்

எளச்சவன் கெடச்சா எகுறுறான்

தலகீழ நிக்குறான் தாண்டவ மாடுறான்

தானென்னு மகத்தையில் தருக்குறான் –இத

எடுத்துச் சொன்னா எதிரில் நிண்ணா

எதிர்த்தவன் ஆவிய பிடுங்குறான் –எமன்

எதிரே வந்தா நடுங்குறான்! -இந்த

(மனுசன)

காது கொடுத்தால் சேதி சொல்கிறேன்

2011-09-30T18:26:00.001+05:30

காது கொடுத்தால் சேதி சொல்கிறேன்

காலம் போகிற போக்கைச் சொல்கிறேன்

காசு கொடுத்தா நாலும் செய்கிற

காலம் இதிலே கவனம் என்கிறேன்

(காது)

அழகாய்ச் சிரித்து அறிவாய்ப் பேசி

அனைத்தையும் சுரண்டும் உலகமடா –தினம்

அதனால் எத்தனை கலகமடா

விழுங்கி ஏப்பம் விடுவதில் இந்த

வீணருக் கில்லை உவமையடா –அவர்

விழுந்து மடிந்தால் உவகையடா!

(காது)

தனக்கு என்றால் தப்பைச் சரியெனத்

தயக்கம் இன்றிப் பறைசாற்றும் –அவர்

தன்னலம் ஆடும் வெறியாட்டம்

மணக்க மணக்கப் பேசும் இந்த

மடயரின் மனதில் முடைநாற்றம் –அது

முற்றிலும் அறிவை வெளியேற்றும்

(காது)

காசுக் காக கல்வி விற்குற

கல்விக் கடைகள் நிறைஞ்சாச்சு –பணம்

மனுசனின் கண்களை மறைச்சாச்சு

பேசும் தரமும் வாழ்வும் குணமும்

மேலை நாட்டை ஒத்தாச்சு –தமிழ்

தமிழரின் நாவினில் செத்தாச்சு!

(காது)

போதையின் பாதையில் போகிற கூட்டம்

பொழுதை அதிலே கழிக்குது –பெரும்

பொருளை அதிலே அழிக்குது

மாதரும் போதையின் வழியில் செல்கிற

வகையும் நாட்டில் செழிக்குது –கண்டு

மானமும் கற்பும் விழிக்குது

(காது)

புதுமை நோக்கில் எதையும் செய்து

புதையின் குழியில் விழுவானே –அது

புரிந்தபின் உட்காந் தழுவானே

எதுமெய் பொய்யென அறியும் தெளிவும்

இவனுக் கில்லை மொழிவேனே –இவன்

இருந்தால் பயனென் பதுவீணே!

(காது)

போனால் இளமை திரும்பாது!

2011-09-26T18:24:00.002+05:30

போனால் இளமை திரும்பாது –அது

போனபின் ஆசை அரும்பாது

காதல் புரிவோம் இளமையிலே –கட்டிக்

கரும்பே கனியே இளமயிலே!

(போனால்)

மீனா தூண்டில் முள்ளா கண்கள்

விருப்பம் போலே வடிவெடுக்கும் –எனை

ஊனாய் தினமும் உண்டு முடிக்க

எப்போது உன்மனம் முடிவெடுக்கும்?

(போனால்)

தொட்டால் சுடுமா விட்டால் சுடுமா

துய்த்தால் தெரியும் காமத்தைக் –கை

பட்டால் நாணம் பறந்து போகும்

பருகித் தீர்ப்போம் இன்பத்தை!

(போனால்)

மச்சம் சிவக்கும் மர்மக் கலையை

மஞ்சம் சேர்ந்தால் கற்றிடலாம் –உன்

உச்சந் தலைமேல் உச்ச இன்பம்

உருகி வழியப் பெற்றிடலாம்!

(போனால்)

இரவுக் குள்ளே இன்னொரு இரவாய்

இருக்கும் கூந்தல் வீட்டினிலே –நாம்

இரவோடு இரவாய் இன்பக் கவிகள்

எழுதிக் குவிப்போம் ஏட்டினிலே!

(போனால்)

ஒத்தக்கல்லு மூக்குத்தி

2011-09-25T12:39:00.003+05:30

ஒத்தக்கல்லு மூக்குத்தி

ஓரப்பார்வ மீன்கொத்தி

நாம்புடிச்ச அத்தமக

நளினமான மான்குட்டி!

(ஒத்தக்கல்லு)

கன்னம்ரெண்டும் பூச்சட்டி

கட்டுங்கூந்தல் கரிச்சட்டி

அச்சில்வார்த்த அந்தப்புள்ள

அதரம்ரெண்டும் கருப்பட்டி

அமஞ்சபுருவம் மண்வெட்டி

அழகுமேனி பொன்கட்டி

எதிர்த்துத்தோத்த வட்டநெலா

எட்டிநிற்குது வரிகட்டி

(ஒத்தக்கல்லு)

பற்களெல்லாம் பனிக்கட்டி

பரந்தமார்பு தேர்முட்டி

பூச்சுழியும் பூத்திருக்கும்

இடுப்பதன்கீழ் இருக்கொட்டி

ஆலங்கட்டித் தொடைதட்டி

அங்குமிங்கும் நடைகட்டி

வருமவளைக் கொண்டாடும்

அகிலவுலகம் கைதட்டி

(ஒத்தக்கல்லு)

எம்மனசில் குழிவெட்டி

காதலென்னும் விதைகொட்டி

ஆசைநீரை வார்த்துவந்த

அவளேஎன் அசல்வட்டி

அன்பென்னும் நெரிகட்டி

நாணத்தைச் சரிகட்டி

கட்டிலோடு கண்விழித்துக்

கதைபடிக்கும் சிறுமெட்டி

பூமியிலே வாழவிடு!

2011-09-05T14:38:00.000+05:30

ஓ! மனிதர்களே!

இது நீர்நடுவே அமைந்த

தேசம் என்பதாலா

எங்கள் கண்களிலெல்லாம்

நீர்கோர்க்கச் செய்கிறீர்

அறம்பற்றிப் பாடுவதும்

அறம் பாடுவதும்

தமிழனுக்கே உரியது

என்பதாலா

இன்று

அறம்பற்றிப் பேசவும்

அஞ்சுகிறீர்

உரிமைக்குப் போராடும்

எங்களின் உயிர்களை

உணவாக்கிக் கொள்ளும்

ஓநாய்களுக்கு உதவுவதையா

உயர்வெனக் கருதுகிறீர்

அகிம்சை ஆயுதம் கொடுக்க

காவிகள் இங்கே

களமாடுகின்றன

வெள்ளையரிடம் எடுபட்ட அகிம்சை

கொள்ளையரிடம்

கோமாலித்தனமாகிப் போனதே

எதார்த்த உண்மை

ஓ! மனிதர்களே!

நாங்கள் அன்பாய்த்தான் கேட்டோம்

ஓங்கி அடித்தே

இல்லை என்றன

ஓநாய்கள்

எங்கள் கைகளை

ஓங்கச்செய்யும் வேலையை

அந்த ஓநாய்களே

ஓய்வின்றிச் செய்தன

நாங்கள் தட்டிக்கேட்டே

பழக்கப் பட்டவர்கள்

முன்பு அவர்கள் கதவுகளையும்

பின்பு அவர்கள் முதுகுகளையும்

தமிழன்

அயலாரிடம்

அவரவர் தாய்மொழியிலேயே

பேசிப் பழக்கப்பட்டவன்

அதனால்தான்

சிங்களர்களுக்குத் தெரிந்த

ஆயுத மொழியிலேயே

அவர்களோடு பேசிக்கொண்டிருக்கிறோம்

நாங்கள் எங்களுக்குள்

ஒற்றுமையாய்

இருக்கக் கருதியதைவிட

அவர்களோடு ஒற்றுமையாய்

வாழக் கருதியதே அதிகம்

தோசைகூட

இரண்டு பக்கம்தான்

சுடு படுகிறது

நாங்கள் எல்லா பக்கமும்

எல்லா பக்கத்திலிருந்தும்

சுடப்படுகிறோம்

இனிமேல் நாங்கள்

எங்கள் பெண்களை

வர்ணிக்கும்போது கூட

மயிலே என்று

வர்ணிக்கப் போவதில்லை

கற்புமுதல் கண்ணீர்வரை

சேய்முதல் செங்குருதிவரை

தாய்முதல் தாய்மண்வரை

எல்லாவற்றையும் இழந்துவிட்டோம்

இனி இழப்பதற்கு எங்களிடம்

ஏதுமில்லை

நீங்கள் எதையாவது கொடுத்து

இழக்கச் செய்தால்தான் உண்டு!

வல்லமை தாராயோ!

2011-08-28T14:35:00.001+05:30

சமச்சீர் கல்விபற்றிய உச்சநீதி மன்றத்தின் தீர்ப்பு வெளியாவதற்கு இரண்டு நாட்களுக்கு முன் எழுதப்பட்டது.

எழுத்தினை ஆய்த மாக்கி

ஏந்திய புலவா! வெள்ளைக்

கழுகினை வீழ்த்தப் பாப்போர்

கண்டயெம் தலைவா! சாதி

அழுக்கினை அடித்துப் போக்கி

அகவாடை வெளுத்த வா!நேர்

செழுந்தமிழ்க் கிலையென் றார்த்த

சீர்மிகு மறவ னேவா!

‘தமிழினி மெல்லச் சாகும்’-

தகையிலாப் புன்சொல் கேட்டே

குமிழியென் றுடைந்த நெஞ்சிற்

குரியவா! இன்றோ அந்த

அமிழ்தனை மொழியை நீக்கி

ஆங்கிலக் கல்வி ஓங்கச்

சமைத்ததோர் ‘சமச்சீ ரு’க்கும்

தடையிடப் பார்க்கின் றாரே!

‘நெஞ்சுபொ றுக்கு தில்லை

நிலைகெடு மனிதர் கண்’டென்

றன்றுநீ சோன்ன சொல்லே

அய்ய!யின் றைக்கும் மன்னிற்

றொன்றிரண் டாஅ வர்கள்

உற்றதோர் பிரிவி னைகள்?

நன்றென்றோர் அரசு செய்யின்

அன்றென்றோர் அரசு நீக்கும்!

குடிமக்கள் காப்ப தாய்த்தன்

குடிதனைக் காக்கு மிந்தக்

கொடியரின் ஆட்சி நீக்கிக்

கொழுந்தமிழ் நாடு மீள

விடுதலைப் பாவி சைக்க

விரும்பினேன்; விரைந்தே அந்த

விடிதலை ஏற்ப டுத்த

விரைந்துநல் வல்ல மைதா!

பொறுத்துப் பார்த்தேன் முடியலே

2011-07-17T02:38:00.003+05:30

பொறுத்துப் பார்த்தேன் முடியலே –நான்

பொறுமை இழந்தேன் முடிவிலே

கருத்துச் சொன்னாக் கசக்குதா –அத

உறத்துச் சொன்னா உறைக்குதா?

உழைக்கச் சொன்னா முனகுறான் –பிறர்

உழைப்பில் வாழ முனைகிறான்

எடுத்துச் சொன்னா எதிர்க்கிறான் –தனைக்

கெடுத்துக் கொள்ளத் துடிக்கிறான் –மதி

மெத்த உண்டு –எனப்

பித்தங் கொண்டு –மன

சுத்தமின்றி நட மாடுகிறான் –அதப்

(பொறுத்துப்)

தப்புக்கு வருந்த மறுக்குறான் –அவன்

ஒப்புக்குந் திருந்தா திருக்குறான்

உப்புக்கும் பொராம தருக்குறான் –வெறும்

உடம்பை வளர்த்து முறுக்குறான் –பயம்

ஏது மின்றி –தன்

மான மின்றி –வழி

மாறிச்சென்று சுகம் காணுகிறான் –அதப்

(பொறுத்துப்)

போக்குச் சரியில்ல அதச்சொன்னா –அவன்

பொங்குறான் ‘அதனால் உனக்கென்னா

ஆச்சு’ண்ணு கேட்குறான் நமக்கென்னா –என

அலட்சியம் பண்ணாத அறிஞரெல்லாம் –அற

நூல்கள் தேடி –மன

நோயைச் சாடி –அறி

வூட்டினால் அரண் டோடுகிறான் –அதப்

(பொறுத்துப்)

தாலாட்டு!

2011-07-17T02:17:00.002+05:30

விழியில் நீரோடை ஏனோ தாமரையே

விடியும் நாள்தூரம் இல்லை வான்பிறையே

சிவனுக்கும் அன்னை தந்தை கிடையாதம்மா

அவன்போலே மண்ணில் வந்து பிறந்தாயம்மா

--- --- ---

பெண்ணாய் வந்து பூமியில் பிறந்தது

பிழையென அழுதாயா

ஈன்றவர் உன்னை எடுத்தெறிந் ததனால்

இருவிழி கசிந்தாயா

ஆடும் மயிலும் கூவும் குயிலும்

அழுவது கிடையாதே

சூடும் மலரே சுந்தர நிலவே

சோகத்தில் துவலாதே

உனக்காக வானம்வந்து நீர்வார்த்தது

எதற்காக உந்தன்கண்கள் நீர்கோர்த்தது -ஒரு

பூவைப்போலே வாழும் –பெண்

புயலாய் மாறக்கூடும் –விழும்

சோதனைகள் –எழும்

சாதனைகள் –ஏன்

வேதனைகள்?

--- --- ---

ஓடும் நதியில் ஓர்துளி என்றே

உன்னை நினைந்தாயா

நாளைப் பொழுது உனக்கென விடியும்

நம்பிக்கை இழந்தாயா

ஆடும் காற்றில் அகல்விளக் கணையும்

சூரியன் அணையாதே

நாணல் போலே நம்பிக்கை வளைந்தால்

நன்மைகள் பிறக்காதே

வலிசெய்யும் வாழ்க்கைதானே வளமானது

உளியின்றிச் செற்பங்களெங்கே உருவானது -ஒரு

புலியைப் போலே பாயும் –துயர்

போனபின் இன்பம் சூழும் –வரும்

காலங்கள் –இனி

வளமாகும் –சுகம்

உனதாகும்!

மாவீரர்!- உரைப்பா! (1996)

2011-04-25T20:22:00.001+05:30

விடுதலை கோவிலுக்கே அணிசேர்த்துச்

சென்றவெங்கள் வீரர்க் கின்று

வடிவுறு வணக்கமிட்டு மேன்மைசெய்யும்

துய்தநன்னாள்; மற்றிந் நாளோ

மடிதலுக் கஞ்சியழும் துயர்நாளன்(று)

அதுவுமன்றி வருத்தம் தோய்ந்து

மிடி*யுறும் நாளுமல்ல; ஈகத்தின்

திருநாளே இந்நாள் ஆகும்!

உண்மையுறு குறிக்கோட்காய் இன்னுயிரை

ஈகித்த* உயர்ந்த வீரர்க்(கு)

இன்றெமது நெஞ்சமெனும் பசுமையினில்

நினைவுறுத்தி ஏற்றம் செய்வோம்;

நன்றவர்கள் மறத்திற்கும் மிகவுயர்ஈ

கத்திற்கும் தலை குனிந்து

நின்றுவணக் கம்செய்வோம்; விடுதலைக்காய்க்

கொடுத்தவிலை அரிய தன்றே!

இறைமைபெற்று மேன்மையுடன் எம்மக்கள்

வாழுமொரு இலக்கிற் காக

மறவர்செய் ஈகங்கள் வரலாற்றில்

ஒப்பிலதாம்; எக்கா லத்தும்

தரைகண்ட போர்களிலே நிகழாத

வியப்பீவு* நிகழ்ந்தி மாந்த

வரலாற்றில் காணொல்லா வீரமிகு

பாவியமெம் மண்ணில் செய்தோம்!

ஒப்பிலது –இணையில்லாதது; வியப்பீவு –வியப்புமிகுந்த தியாகம்

எம்முள்ளே எரிகின்ற விடுதலை

நெருப்பணைக்க எதிரி யோடு

தம்கைகள் கோர்த்தோரால் பலகாலும்

சரிவுகளைச் சந்திக் கும்நாம்

எம்வலியின் மேலான வலிகளொடு

போராடும் வலிவந் தத்தால்*

எம்மிந்த விடுதலைக்கு நாம்கொடுக்கும்

விலையுலகிற் பெரிய தன்றே!

உயிரைவிலை யாக்கொடுத்தே விடுதலைத்தீ

அணையாமல் வீரர் காத்தார்

அயிர்ப்பின்றி* நாமவரை நம்தேசக்

காவலிறை களாக மேன்மை*

செயல்வேண்டும்; விடுதலைச் செலவி(ல்)*பல

நெருப்பாற்றைக் கடந்தோம்; இந்தத்

தழல்புகுகை* தனிலழியா திருத்தற்கெம்

உறுதியொன்றே கரணி யம்மாம்!

அயிர்ப்பு –ஐயம்; மேன்மை –கௌரவம்; செலவு –பயணம்; தழல்புகுகை –அக்னிப்பிரவேசம்.

இனவழிவு அடக்குமுறை யால்நைந்த

எம்மக்கள் இன்னல் தீரத்

தனித்ததொரு தன்னாட்சி கோருமெங்கள்

குறிக்கோலில் தவறொன் றில்லை;

முனைப்பொடுநாம் பற்றிநிற்கும் குறிக்கோலே

மலையளவு மொய்ம்பைத் தந்து

தனித்துவமும் சிறப்பான வரலாறும்

இயக்கத்திற் கீந்த தாகும்!

ஈழத்தில் அதிர்ந்திட்ட அரசியற்

சூழ்நிலைக் கேற்ற வாறு

வாழவழி யறியாமல் அழிந்தபல

குழுக்கள்போல் மறைந்தி டாமல்

சூழவரும் சூழ்ச்சிகளை எம்முறுதி

யால்வென்றோம்; தூய நெஞ்சின்

ஆழத்தில் நாம்கொண்ட உறுதியினை

எவ்வலியால் அகற்ற ஒல்லும்?

எம்மண்ணை விழுங்கவந்த இந்தியத்தின்

படையெடுப்பே அன்று நம்மின்

மொய்ம்புமிகும் உறுதிக்குப் பெருவினாவாய்த்

தோன்றியது; முகிழ்ந்த அந்த

பொய்ம்முகத்து வல்லரசின் மேலாண்மை

எமைவலிவாய்ப் போந்து தாக்க

மெய்ம்மையுடை உறுதியொன்றே எம்மிறுதி

ஆய்தமாய்* மிளிர்ந்த தன்றே!

இந்தநாள் புதியதொரு வன்கவர்புப்

போரையெதிர் கொண்டு நின்றோம்;

சந்திரிகா அரசென்ற வடிவங்கொண்

டெமதுவர லாற்றுத் தெவ்வர்*

செந்தமிழர் இனவழிப்புப் போர்நடத்தித்

தமதுபடைத் திறத்தை எல்லாம்

வந்தொன்று திரட்டியென் வடபுலத்தை

வன்கவர்பால் வளைத்து நிற்கும்

பலப்பலவாய் வெடிபொருட்கள் பேரளவிற்

படையணிகள் பயன்ப டுத்திப்

புலிப்படையின் வலுவழிப்ப தேயிந்த

வன்கவர்புப் போரின் மூல

வலிமையுடை சூழ்ச்சியென வாய்க்கினுமக்

குறிக்கோளை அடைவ தில்தான்

வலிவிழந்து படுதோல்வி அடைந்திட்ட

சிங்களர்கள் வாடி நின்றார்!

நாற்புறமும் கடல்சூழ்ந்த நிலவியலின்

அடிப்படையில் நமக்குக் கேட்டை

ஏற்படுத்தும் நிலப்பரப்பில் பெருஞ்சமர்கள்

தொடுத்தெமது செம்மல்* மாய்க்கப்

பார்க்கின்ற படையணியின் சூதறிந்து

நாம்நடக்க யாழ்மண் மீது

மேற்கொண்ட சமரவர்க்குக் கைகூட

வில்லையிது மெய்மை யன்றே!

கரந்தடிபோர்* முறையிலுயிர் இழப்பகற்றி

ஆளணியைப் பின்ன கர்த்தி

உரிமையுடை நிலப்பரப்பை இழப்பதுவும்

தற்பொழுதைப்* பின்ன டைவே;

உரமுறுதி மொய்ம்பிருப்பின் ஏற்புறுநற்

பொழுதிற்போர் ஒலித்துத் தெவ்வர்

உரமழிக்க இயன்றிடுமுன் பிழந்தநிலம்

மீட்டிடவும் ஒல்லு மன்றே!

முல்லையில்நான் ஈட்டியதோர் பெருமைமிகு

வினைத்திறனே* அதற்குச் சாட்சி;

தொல்லைதரும் சிங்களருக் குயிரியப்பை

இப்போரில் தோற்று வித்துக்

கொல்லவரும் பகைவலியை மெலியச்செய்(து)*

இழந்தநிலம் கொண்டோம்; நம்மின்

வல்லமையைப் பேணியத்தால் வந்தவெற்றி;

படைவலியை மேலும் சேர்த்தோம்!

‘அமைதிப்போர்; தமிழவிடு தலைக்கான

படையெடுப்’பென் றார்த்து நம்மின்

அமைதிகுலைத் தகதிகளாய் அடிமைகளாய்ப்

பொருள்வளத்தை அழித்தென் றும்மில்

குமைமிக்க அவலத்தைக் கொடுத்துள்ளார்;

அமைதியெனும் கொள்கை பேசி

எமக்கெதிராய் அமர்க்களத்தைச் சந்திரிகா

அரசியற்றி

யாழ்திறந்த வெளிச்சிறையாய் மாற்றப்பட்(டு)

உயர்பாது காப்பென் றாங்கே

தாழ்குழிகள், மண்மேட்டின் அரண்களோடு

முள்வேலி தமிழ நாட்டின்

சூழ்புறமெல் லாம்காவல் நிலைய(ம்)பல

காட்சிதரத் தொன்மை மிக்க

யாழ்மண்ணில் படையினரின் அச்சுறுத்த

ஆட்சிநடை பெறுதல் காண்பீர்!

தளைப்படுத்திச் சிறைவைப்பும் உடலூறும்*

வல்லுறவும் நிகழ்த்தி யாங்கே

கொலைகளொடு காணாமற் போதலும்பின்

புதைகுழியிற் கண்டெ டுப்பும்

தலைதூக்கும் கொடுமைமிகு நிகழ்வுகள்

படையினர்சூழ்ந் தாளு மெம்மின்

நிலத்திலின வழிப்பைமறை முகமாகச்

செய்கின்ற தென்றே காட்டும்

வன்கவர்புப் பகுதிகளில் நிகழ்கின்ற

அட்டூழி யங்க ளோடு

தென்னிலங்கை தனில்தமிழர் பகைச்செயலும்

சந்திரிகா அரசின் உண்மைத்

தன்மையெனும் இனவாத முகத்தைவெளிப்

படுத்தியுள்ள தவரின் ஆட்சி

முன்னாண்ட அரசுகளை விடத்தமிழர்

ஆதனை*ப்புண் படுத்திற் றன்றே!

சந்திரிகா அரசுதமி ழர்க்குநயன்

மை*வழங்கப் போவ தில்லை;

எந்தமிழர் தேசியத்தின் சிக்கலுக்கும்

நன்னெறி*யில் தீர்வு காணார்;

இந்தபெரும் உண்மையினைத் தொடங்கமுதல்

நாமறிவோம்; அமைதிப் பேச்சில்

இந்தரசின் கடும்போக்கும் கரவுமனத்

தாலுமெமக் கேமாற் றம்தான்.

தமிழர்தம் எளியநிலை*த் தேவைகளை

யும்நிறைவு செயம றுத்துத்

தமதுபடை மேலாண்மை நலம்பேண

முனைந்ததினால் அற்றைப் பேச்சின்

அமர்வுபொருள் அற்றுமுடி வடைந்தது;தம்

படைவலியை நம்பிப் பேச்சின்

அமர்வுக்கு முதன்மைகொடா(து) அரசுபேச்சை

முறிவடையச் செய்த தன்றே!

தமிழர்தம் தாயகத்தில் படையினரிம்

மேலாண்மை* தன்னை நாட்டி

தமதாய்தத் துணைகொண்டு நமையாளும்

விழைவதனால் சிக்கல் நீண்டு

அமைதிகுலைந் தென்றுமிலா அளவிற்போர்

விரிவடைந்தே அழிவைச் சேர்க்கத்

தமதுபொருள் வளங்குன்றி மீளொல்லா

நெடுக்கடியால் தவித்து நிற்கும்!

மேலாண்மை -மேலாதிக்கம்

(பின்வரும் ஐந்து பாடல்களும் ஒருதொடர்)

சந்திரிகா அரசினின வழிப்புப்போர்

தமிழர்தம் நாட்டில் வாழ்வில்

வந்துபெரும் சீரழிவைச் செய்ததுடன்

முழுஇலங்கை நாட்டி னையும்

முந்திவரும் பேரழிவிற் தள்ளுவதை

அனைத்துலகும் உணர்ந்து கொண்ட(து)

இந்தபெரும் போர்க்கெதிராய் எழுமுலகின்

அழுத்தத்தைத் திசை திருப்ப

சந்திரிகா அரசமைதி சைகைசெயத்

தொடங்கி யுள்ள(து)

இந்தபெரும் சிக்கலினைத் தீர்த்திடமூன்

றாந்தரப்பு நடுவம் என்றும்

வந்திருந்து புலிகளுடன் பேசிடவும்

அனியமென்றும் அறிக்கை விட்டு

வந்துபுலி இயக்கத்தார் ஆய்தத்தை

ஒப்படைக்க வேண்டும் என்னும்

நகைப்புமிகு வன்கட்டுப் பாட்டினைமுன்

வைக்கின்றார் நாடி வந்தித்

தகையமதிப் பற்றதொரு வன்கட்டை

எந்தஒரு தன்ம திப்பும்

மிகப்படைத்த விடுதலை இயக்கமுமே

ஏற்றிடப் போவ தில்லை;

தகைமிக்க தமிழர்தம் தேசத்தை

மீட்டெடுக்க எழுந்த இந்த

விடுதலைப்போ ராட்டத்தை ‘அச்சுறுத்தப்

புரட்சி’*யென்றும் விடுத லைக்காய்

அடுகின்ற இயக்கத்தை ‘அச்சுறுத்த

அமைப்பெ’ன்றும் அனைத்து நாட்டிற்(கு)

எடுத்துத்தீ விரைவுபரப் புரைசெய்து

உலகினிலெம் இயக்கத் திற்குத்

தடைவிதிக்கப் பெருமுயற்சி செய்துவரும்

இவ்வேளை ஓராண் டுக்குள்

புலிப்படையை ஒழித்திடுவோம் என்கின்ற

அறைகூவல் விட்டுப் போரை

வலிந்துதொடங் கிடபடையை அனியநிலைப்

படுத்துமிந்த சூழ லில்தான்

அலி*மனத்துச் சந்திரிகா அரசமைதி

தனைப்பேசி ஆர்க்கும் போக்கில்

புலிகளெமக்(கு) அவரணுகு முறைதன்னில்

மிகவையம் தோன்று மாதோ!

மிடி –துன்பம்; வலிவந்தம் –நிர்பந்தம்; தழல்புகுகை –அக்னிப் பிரவேசம்; முகமை –முக்கியம்; செம்மல் –வலிமை; கரந்தடிபோர் –கொரில்லாபோர்; தற்பொழுது –தற்காலிகம்; தெவ்வர் –பகைவர்; வினைத்திறன் –சாதனை; மெலியச்செய்தல் –சேதப்படுத்துதல்; தளைப்படுத்தல் –கைதுசெய்தல்; உடலூறு –சித்திரவதை; ஆதன் –ஆன்மா; நயன்மை –நீதி; நன்னெறி –நியாயம்; எளியநிலை –சாதாரணம்; வன்கட்டு –நிபந்தனை; அடுதல் –போராடுதல்; அச்சுறுத்தப் புரட்சி –தீவிரவாதம்; அலிமனம் –தீமனம்;

மாவீரர்!- உரைப்பா! (1995)

2011-04-10T20:17:00.001+05:30

விடுதலைக் காய்த்தன் உயிரை

வீரர்கள் ஈந்ததை எண்ணி

நெடுமனத் தேற்று வணங்கும்

நேரிலா நாளிது; மக்கள்

விடுதலை, கண்ணியம் மற்றும்

விளிவறு காப்புடன் வாழும்

விடுதலைக் காக இறப்பை

விரும்பிமேற் கொண்டனர் அன்றே!

பிறந்து வளர்ந்துநாம் வாழும்

பெட்புடை இந்தநன் நாடே

மறைந்த எமதரும் முன்னோர்

மலர்த்தாள் சுவடுகள் ஏந்திச்

சிறந்துள தித்தரை தானெம்

தேரிய பண்பா டுடனே

பிறங்கிடும் வரலா றென்னும்

பெருவேர் வளர்த்தது மாகும்!

இத்தரை எங்களின் தாய்நா

டென்றா கிடவேண் டுமென

நத்திய தோர்குறிக் கோட்காய்

நண்ணி* மடிந்தனர் வீரர்;

இத்தரை தன்னைத் தலைமை*

இயற்றும் வலிகளை நீக்கி

மெத்த* விடுதலை நாடாய்

மேலெழ சாவினை ஏற்றார்!

நமதுதாய் மண்ணினை மீட்க

நடத்திய துய்தநற் போரில்

எமதுவீ ரர்களின் ஈகம்

இயம்பிட சொற்களே இல்லை;

அமைந்தயிப் பார்வர லாற்றில்

அறிந்திடா மேன்மைச் செயல்கள்

எமதிந் நிலத்தில் நிகழும்

எம்மின் விடுதலைக் கன்றே!

மேன்மை மிகப்படை திட்ட

வீர வரலா றிதனை

ஈன்ற மறவரின் வேட்கை

இனிதொரு நாள்நிறை வேறும்;

தான்எனும் செல்வச் செருக்கும்

தனது படைவலி யாலும்

ஈண்டொரு மாப்படை யாழ்மண்

இறக்கியுள் ளானெம் எதிரி!

பழம்பெரு மைமிகு யாழ்மண்

பாழ்படக் குண்டினை வீசும்

இழிந்தவர் வன்கவர் புப்போர்

இயற்றிடும் நோக்கம் யாழின்

எழிலுறு செல்வ வளத்தோ

டெம்மின் கலைமர பனைத்தும்

அழித்துநம் மக்களின் வாழ்வின்

ஆணிவேர் வீழ்த்துவ தன்றோ!

நடைபெறும் இப்போர் தமிழர்

நாட்டை அழிப்பதே அன்றிப்

படையெடுத் தேகும் அரசு

பகருதல் போல நமது

விடுதலை வேங்கைக் கெதிராய்

விளைந்ததில்; சிங்களர் கூட்டம்

தொடுக்கும் இனவெறிப் போரின்

தொன்மை மிகநீண் டதாகும்!

புலிதொன் றுமுனம் பிறந்து

போந்த வரலா றிதனை

அலிமகள் சந்திரி காவின்

அப்பனே தொற்றுவித் தான்இன்(று)

அலிமகள் சந்திரி காவின்

அமர்வெறிப் போக்கிற் குமிகப்

பொலிவுறு தோற்றம் முழுதாய்ப்

போர்த்திடப் பட்டுள தன்றே!

தலைமை –ஆதிக்கம்; மெத்த -மிகவும்

பார்வை ஒன்றே போதும்!

2011-04-04T13:48:00.003+05:30

கண்ணசை வொன்று போதும்;

காலிடும் கோலம் போதும்;

சின்னகை வளையல் சிந்தும்

சிணுங்கலே போதும்; தோன்றும்

எண்ணமெல் லாமும் நீயே

என்பதை எடுத்துச் சொல்ல

புன்னகை சிந்தும் இந்தப்

பூவிதழ்ச் சொல்லா வேண்டும்?

முன்புறம் இட்ட கூந்தல்

முடிச்சினை அவித்து மீண்டும்

பின்னிடும் கைகள் ரெண்டும்

பேசிடாக் காத லையா

என்னிதழ் பேசக் கூடும்?

எவரோபோற் காணும் கண்கள்

தன்னைப்போல் காதல் சொல்லத்

தக்கதோர் மொழியுண் டாமோ?

பார்வையால் பேசிப் பேசிப்

பழகிய நாளில் காதல்

வேர்வைக்கா திருந்த துண்டா?

வெற்றுச்சொல் வெந்நீ ருக்கா

வேர்வைக்கக் கூடும்? நெஞ்சம்

விழைந்துனை என்னை நீங்க

நேர்ந்தபின் வாய்ச்சொற் கங்கே

நின்றிடும் தகுதி யுண்டா?

முற்றிய காதல் காயை

மௌனமே கனியாய் மாற்றக்

கற்றுள தென்பேன்; காயைக்

கனிசெயப் புகையிட் டாற்போல்

சொற்களைக் கொண்டா காதல்

துளிர்ப்பது? நெஞ்சும் நெஞ்சும்

பற்றுதல் கொண்ட பின்பு

பார்வையே போதும் அன்றோ!

படப்பா! 20

2011-03-29T13:05:00.005+05:30

படப்பா! 19

2011-03-25T13:03:00.004+05:30

படப்பா! 18

2011-03-22T13:00:00.004+05:30

படப்பா! 17

2011-03-18T12:56:00.005+05:30

படப்பா! 16

2011-03-16T12:47:00.004+05:30

நூல் அறிமுகம்!

2011-03-14T11:44:00.000+05:30

அமுதன் குறள் நூல் வெளியிடப்பட்டுள்ளது. வாங்க விரும்புவோர் கீழ்கண்ட முகவரியில் தொடர்புகொள்ளவும்.

அகரம் அமுதன்
அகரம் சீகூர் (அஞ்சல்)
குன்னம் (வட்டம்)
பெரம்பலூர் -621 108

பேச 9940723625

படப்பா! 15

2011-03-12T12:44:00.004+05:30

படப்பா! 14

2011-03-09T12:41:00.002+05:30

படப்பா! 13

2011-03-04T12:34:00.001+05:30

படப்பா! 12

2011-02-28T12:27:00.002+05:30

படப்பா! 11

2011-02-25T12:16:00.003+05:30

படப்பா! 10

2011-02-22T12:11:00.000+05:30

படப்பா! 9

2011-01-01T08:29:00.003+05:30

படப்பா! 8

2010-12-29T10:37:00.005+05:30

படப்பா! 7

2010-12-27T10:31:00.005+05:30

படப்பா! 6

2010-12-25T10:27:00.005+05:30

படப்பா! 5

2010-12-22T10:23:00.003+05:30

படப்பா! 4

2010-12-19T10:12:00.004+05:30

படப்பா! 3

2010-12-16T10:05:00.003+05:30

படப்பா! 2

2010-12-13T10:02:00.002+05:30

படப்பா! 1

2010-12-11T09:58:00.001+05:30

மாவீரர்! -உரைப்பா! (1994)

2010-11-19T18:24:00.001+05:30

எம்மக்கள் விடுதலையே பெற்றுமதிப் பொடும்மேன்மை
இயையப் பெற்றும்
செம்மாந்து வாழ்ந்திடவே வேண்டுமெனும் குறிக்கோளைத்
தேர்ந்து பற்றித்
தம்வாழ்வை தம்முயிரைத் தந்தீகம் செய்திட்ட
தகைஞர் தம்மை
எம்நெஞ்சக் கோயிலில்வைத் தெழில்வணக்கம் செய்துய்த*
நாளாம் இந்நாள்!

எமதுவிடு தலைக்காக மதிப்பிடுதற் கொல்லாத
விலைகொ டுத்தோம்;
அமர்க்களம் ஆக்கப்பட் டெம்மண்ணில் குருதிநிறை
ஆறு பாயும்;
எமதரும் வீரரிற்றை நாளினிலும் விடுதலைக்காய்
இறப்பை ஏற்றார்;
எமதுவீ ரர்நினைவுத் தூண்களுமே விடுதலையை
வேண்டி நிற்கும்!

புதியதொரு அணுகுமுறை திட்டத்தோ டாட்சிசெயப்
போந்தார் அந்தப்
புதியவராம் சந்திரிகா அரசமைதிக் கைநீட்ட
போந்து பற்றி
எதிரிகட்கு வன்கட்டுப் பாடெதையும் விதித்திடா
தியைந்து பேச்சின்
முதற்கட்டத் தெமதீழ மக்களுறும் இடர்களுக்கே
முதன்மை தந்தோம்!

சிங்களர்தம் படையமைதி வழியிலெம் சிக்கலினைத்
தீர்க்க நத்தா*
தெங்களின்மேல் நடுவுநிலை அற்றதொரு போர்தொடுக்க
ஏகும் போக்கை
அங்கணுள சந்திரிகா அரசும்கை விட்டதுவாய்
அறிந்தோ மில்லை;
தங்க(ள்)படை நிலைக்கெதிராய்ச் செயல்படவும் விரும்பிடுவ
தாகக் காணோம்!

அரசமைதி வேண்டுவதில் அக்கறையாய் இருக்குமெனில்
அவ்வ ழித்தன்
முரசறையும் படையினையும் முடுக்கிவிடின் எளிதாகும்;
மூளும் போரை
நிறுத்துவதும், பொருள்தடையை நீக்குவதும், நீர்வழியை
நிலத்தில் சாலை
திறத்தலொடு மீள்குடிவைப் பிவையனைத்தும் படையிருப்பைப்
பொருத்த தேயாம்!

அமைதிக்குத் தடையாக அமைந்தவர்கள் நாமில்லை;
அமைதி வாசல்
தமையும்நாம் மூடவில்லை; எம்மக்கள் அன்றாடம்
சார்ந்து நிற்கும்
குமை*களைய விரும்புகிறோம்; எம்மதிப்பைப் பெறவேண்டின்
கொடுங்கோ லாளர்
அமைதியுடன் இயல்புநிலை எம்நாட்டைச் சூழ்ந்திடுமா
றமைதல் வேண்டும்!

நீண்டதொரு குருதிப்போர் கண்டுவரும் எம்மியக்கம்
நேர்ந்த போரை
யாண்டுமொரு உயர்மட்டத் தெடுத்துசெலும் தன்னாட்சிக்
கான மிக்க
நீண்டதொரு கட்டமைப்பை நிறுவியுளோம்; வலிமைமிகு
கடைக்கால் நின்றோம்;
ஈண்டெமது* கடைக்காலை இயைத்தவரைப் போச்சாவா*
திருத்தல் வேண்டும்!

ஆற்றலுடை படையாய்நாம் அமைந்ததினால் சிங்களர்தம்
அரசு பேச்சுக்
கேற்றதொரு ஆர்வத்தைக் காட்டுகிற தருந்தமிழர்
இன்னல் தீர்க்க
மாற்றமிலா அமைதிவழி தீர்வுதனை வைக்குமெனில்
மருங்கு நிற்போம்;
ஏற்றமுறு தன்னாட்சிக் கட்டமைப்பை முன்வைக்கின்
ஏற்றுக் கொள்வோம்!

சலுகைகளைப் பெறுமெளிய குழுவல்ல; விடுதலையைச்
சமைக்கு மெங்கள்
இலக்கெமது தாய்மண்ணில் மதிப்பமைதி விடுதலையும்
இயையப் பெற்றுக்
கலக்கமற வாழ்வதுவே; எம்விருப்பை நிறைவேற்றும்
கவினார் தீர்வே
நிலைக்குமொரு தீர்வாகும்; என்றுமொரு ஒப்புரவை
நிலைநி றுத்தும்!

ஒப்புரவாம் தீர்வதனை உற்றிடவே ஓரினமாய்
ஒருதே சத்தை
எப்பொழுதும் வேண்டிநெகிழ் வற்றுறுதி பூண்டவராய்
இருத்தல் வேண்டும்;
ஒப்பிலதாம் இந்நாளில் உயிரீகர் உறங்குமிடம்
ஒளியை ஏற்றி
அப்பெருமீ கர்குறிக்கோட் குப்பரிசாய் உறுதியிதை
அகத்தில் ஏற்போம்!

துய்தம் –புனிதம்; நத்தாது –விரும்பாது; குமை –துன்பம்; ஈண்டு –இவ்விடம்; பொச்சாவாது -மறவாது.

அகரம் அமுதன்

மாவீரர்! -உரைப்பா! (1993)

2010-11-13T18:22:00.003+05:30

உரமிக்க போர்கள்செய் துடைத்தடிமைத் தளையகற்றி
உயிர்த்த நாட்டில்
பொருள்மிக்க விடுதலையைப் புரிந்தவரைப் போற்றுகிறோம்;
பூந்தாய் மண்ணின்
உரிமையெமக் குரியதென ஊருலகிற் குணர்த்தினரெம்
ஒப்பில் லாத
வரலாற்றுச் சிற்பிகளாம் மாவீரர் தம்நினைவால்
மலர்ந்த திந்நாள்!

அழுதுபுலம் பிடுதற்கோ அண்டிஅள றுறுதற்கோ
அல்ல இந்நாள்
எழிலுறபுத் துயிர்க்கும்நாள்; ஏற்புறுதி யால்தேச
எழுச்சி நாளாம்!
தழுவியதோர் உயர்ந்தகுறிக் கோளுக்காய்த் தன்னுயிரைத்
தந்தார் ஈகம்
தொழத்தகுமச் செயல்மறவர் தூயமறை வெளியதெனச்
சொல்வா ருண்டோ?

தீதறுநல் மாமறவர் ஈகமது விடுதலையின்
செப்ப ஒல்லா
ஆதனிக விருப்பத்தை அறைகிறது; வேட்கையுடன்
அன்னை மண்ணின்
காதலுறு விடுதலைக்காய்க் களங்கண்டே ஈகியராய்க்
கால மானார்
ஓதமுறும் ஈகைவிடு தலைவேள்வி தன்னிலெழும்
ஒளியு மாகும்!

நம்தாய்மண் தனிலுறங்கும் நல்வீரர் கல்லறைகள்
நன்கொ லிக்கும்
செம்மாந்த விடுதலையின் செம்பாடல் இங்கெமது
செருக்க ளத்தில்
அம்மாப்போ ராட்டத்தின் அரிதான இயங்குதிறன்
ஆக மாறி
எம்மாறா யிரமீகர் உறுதியுரி மையிவற்றால்
எழுந்த தன்றே!

நீண்டபெரும் போராட்டில் நேர்ந்தபல சிக்கல்கள்
நீளி டுக்கண்
யாண்டுமெமைத் தொடர்ந்தாலும் யாமெமது நிலைப்பாட்டில்
வழுவா நிற்போம்
ஈண்டெமது சிக்கல்கட் கோர்தீர்வாய் இறையாண்மை
மிக்க ஈழம்
வேண்டுமெனும் எம்முறுதி உலகிற்கும் பகைவர்க்கும்
விளங்கும் நன்றே!

தனியீழம் பெறமக்கள் தம்மாணை பெற்றபல
தமிழர் கட்சி,
‘இனிதீழம் தோற்றமுற எடுத்திடுவோம் கருவி’யென
இயம்பிச் சென்ற
நனிகுழுக்கள் இவையிரண்டும் இரண்டகமே இழைத்துளன;
நாமே ஏற்ற
தனியீழக் குறிக்கோளைத் தடம்பிறழா துறுதியுடன்
தாங்கி நின்றோம்!

தமிழீழக் குறிக்கோளைச் சார்வதிலே வெற்பனைய
தடைகள் உண்டு;
நமதுகுறிக் கோட்கெதிராய் நடக்கின்ற வலிகளையும்
நாம றிந்தோம்;
எமைச்சூழ்ந்த மண்டலத்து வல்லரசின் நுண்ணுத்தி
யாலே தோன்றும்
சுமைமிக்க குறுக்கீட்டைத் துணிந்தெதிர்த்தோம்; விளிவினிலும்
சுணங்கா நின்றோம்!

அனைத்துலகின் கொள்கைக்குள் அடங்கியதே எமதுவிழை(வு)
அதுவு மன்றித்
துணையெனவே நயன்மையெங்கள் மருங்கிருக்க உறுதியுடன்
தொடர்ந்தோம் போரை
எனைத்துமொரு தன்னுரிமை தனிநாடு பெறுந்தகுதி
எமக்கு முண்டாம்
அணைந்துறுதிப் பற்றதனை அகமேற்றால் விடுதலையை
அடைய ஒல்லும்!

மாந்தநெறி எனுமச்சில் மண்ணுலகம் சுழலவில்லை;
மக்கள் மேன்மை
சார்ந்தஅற நெறி,உரிமை பேணவில்லை; தம்நயன்மை
சாற்றி முன்வைத்
தேந்திடுவர்; பொருள்,வணிகம் இவையுலகின் ஒழுங்குறவை
இயற்ற வாய்மை
சார்ந்தஎங்கள் நன்னெறியைத் தரணியுடன் பட்டேற்கத்
தயங்கு மன்றே!

எமக்கிணக்க மானதொரு நற்சூழல் நானிலத்தில்
எழலாம்; அன்று
நமதினிய நயன்*மிக்க குறிக்கோளை நானிலமும்
நத்தக் கூடும்;
நமதுபெரும் போராட்டம் உண்மையிலிவ் உலகத்தை
நம்பி இல்லை;
எமதுவெற்றி எம்முறுதி முயற்சிவலி இவற்றைச்சார்ந்
திருக்கக் காண்பீர்!

அறநெறிசார் நயன்மையொன்றே வெற்றிதரா; வலிமைமிகும்
அருங்கோட் பாட்டில்
உறுதிமிக உடையவராய் உயிர்குடிக்கும் போர்த்தொழிலில்
உறப்பு* மிக்க
திறமைமிகப் பெற்றவராய்த் திகழ்ந்திடவும் வேண்டும்நம்
தேசம் தன்னின்
முறைமையுறும் ஒத்தேற்புக் காய்நாமே போராடல்
முறைமை ஆகும்!

சிங்களரின் இனப்பகைமை அரசுநயன் மைவழியில்
சிக்க லைத்தீர்த்
திங்கணுறும்* எனவெதிர்பார்த் திடவொல்லா; வன்முறையின்
திசையில் சென்றே
இங்குள்ள சிக்கலினை எதிர்கொள்ளப் பார்க்கின்ற
திரக்க மற்ற
தங்க(ள்)படை அணுகுமுறை யால்நாற்பான் ஆண்டாயெம்
சிக்கல் நீளும்!

ஆதனிகம் –ஆன்மீகம்; ஓதம் –பெருமை;நுண்ணுத்தி –தந்திரம்; சுணங்காது –சோராது; விழைவு –விருப்பம்; எனைத்தும் –முழுதும்; நயன் –நீதி; உறப்பு –செறிவு; இங்கண் –இவ்விடம்.

அகரம் அமுதன்

மாவீரர்! -உரைப்பா! (1992)

2010-11-04T06:18:00.002+05:30

இன்றுமா வீரர் நாளாம்;
இத்தரை வரலாற் றில்நேர்
ஒன்றிலாப் பாவி யம்மாய்
உயர்ந்துநம் விடுத லைப்போர்
நின்றிடச் செய்த வீரர்
நெடுதுயில் கொள்வ தெண்ணி
நன்றுநாம் நெஞ்சில் வைத்து
நற்றொழு கைசெய் நாளே!

தன்னின மீட்சி ஒன்றே
தன்குறிக் கோளாய்க் கொண்டு
தன்னுயிர் மேல தாக
தழுவிய குறிக்கோ ளுக்காய்
இன்னுயிர் ஈந்தார் கொள்கை
இளவல்கள்; விடுத லையே
மன்னுநற் பேறாம்; மாந்த
வளர்ச்சியும் பொருளும் அஃதே!

இத்தரை பிறந்த நாளாய்
எழுந்தபோர் புரட்சி யெல்லாம்
தத்தமை அடிமை கொண்ட
தளைகளை உடைக்க வன்றோ!
வைத்தழி செய்தும், தாழ்த்தி,
வகையுற சுரண்டி வாழ்ந்தும்
மெத்தவே எதிரி யாகி
மனிதனை மனிதன் தின்றான்!

விரிந்தயிப் பார்மி சைத்தன்
விடுதலை அற்று வாழ்வோர்
இருக்கிற நாள்வ ரைக்கும்
இருந்திடும் விடுத லைப்போர்;
ஒருவரின் விடுத லையை
ஒழித்திட ஒருவர் ஏகின்
அறங்கெடும்; இனம்கு லங்கள்
அரும்பிடும்; மோதல் மூளும்!

தன்னுரி மையி ழந்து
தரணியில் தவிக்கும் மக்கள்
தன்னிலோர் பிரிவாம் நாமும்
தகைந்து*போ ராடு கின்றோம்!
இன்றுபோ ராடு கின்ற
ஏனையோர் போரின் மேலாய்
ஒன்றிநம் போர்க்கு ரல்பா
ரொலித்திடல் கண்டு கொள்வீர்!

எங்கணும் காண ஒல்லா
ஈகமும் ஈவும் செய்த
எங்களின் வீரர்க் கீடாய்
இங்காரு மில்லை; வீரம்
பொங்கிடும் பாவி யத்தைப்
புரிந்தனர்; ஒடுக்கப் பட்டோர்க்
கெங்களின் போராட் டம்மே
ஈடுகாட் டான தன்றே!

இறப்பினுக் கஞ்சி டாத
எழில்மிகும் உறுதிப் பாடும்
மறவ(ர்)தம் வலியும் எங்கள்
மற்போர்க்கு வளமை சேர்க்கும்
உறப்பிலாப் பகைவர் போல
உதவிகேட் டலையாப் போக்கால்
அறக்கழி வாளர் கூடி
அடக்கியும் நிமிர்ந்து நின்றோம்!

எமைநெருக் கடிகள் சூழ
எம்விடு தலைப்போர் மிக்க
அமைவுறும் இக்கட் டுக்கள்
அடைந்தெதிர் நோக்கி நிற்கும்;
அமைதியின் கதவ டைத்தே
அடுகளத் தேகும் மாணார்
தமிழினத் துன்பம் தீர்க்கத்
தகவுடன் தீர்வு காணார்!

என்றுமில் லாத போரை
எடுத்தனர்; உக்கப் போரை
நன்றுநாம் எதிர்கொண் டாடி
நலித்தனம்; பேரி ழப்பை
என்றுமில் லாவ கையில்
எதிரிகண் டானெம் மண்ணில்
என்றுமே வன்க வர்புக்
கிடமிலை உணர்த்தி விட்டோம்!

போரினால் பொருளி ழந்தும்
பெரும்நெருக் கடிக ளுற்றும்
நேரிலாப் புலிப்ப டைமுன்
நின்றிட ஒல்லாப் போழ்தும்
சீரிலாப் படைந டத்தித்
திருவிலா வன்க வர்பே
தீர்வெனச் சிங்க ளர்கள்
தீவிரம் காட்டு கின்றார்!

கருவிகொண் டெமைய டக்கக்
கருதிடும் பகைவர் போக்கில்
ஒருசிறு மாற்ற மில்லை;
உணர்ந்தினப் பகையாம் சேற்றில்
இருந்திடும் அவரால் எம்மின்
இச்சையை நிறைவு செய்ய
ஒருதீர்வுந் தோன்றா தென்ற
உண்மைநாம் உணர்தல் வேண்டும்!

நாற்பதாண் டிற்கும் மேலாய்
நடக்குமெம் விடுத லைப்போர்
ஏற்புறும் அமைதிப் போராய்
எழுந்துபின் ஆய்தப் போராய்
மாற்றமுற் றெத்த னையோ
வழிதனில் நயன்மை கேட்டும்
மாற்றலர்க் கெம்கு ரல்தம்
மனந்தொட்ட தாகக் காணோம்!

காலமும் எமது மக்கள்
கண்டபே ரவலத் தொடு
மாளவும் அழிவு மாக
வருத்ததின் சுமையால் மக்கள்
சாலமும் குருதி சிந்திச்
சாகிறார்; இவையெல் லாமும்
ஆளுமச் சிங்க ளர்தம்
அகந்தொட்ட தாகக் காணோம்!

ஈவிரக் கமிலான்; போரை
ஏற்பவன்; எமது நாட்டின்
ஆவியைப் பறித்து மக்கள்
அழிவினைக் குறிக்கோ ளாக்கிக்
கூவிடும் பகைவர் நெஞ்சம்
குறைகளைந் தெமக்கு நீதி
மேவிடக் காண்பா ரென்று
மிழற்றிட ஒல்லா தன்றே!

இந்நிலை யில்நாம் போரை
ஏற்பதைத் தவிற வேறு
நன்னிலை கண்டோ மில்லை;
நடைபெறும் போரின் போதும்
திண்ணிய அமைதி வாசல்
திறக்கிறோம்; அமைதி தன்னை
உன்னியே எதிரி வந்தால்
உறவுற அணிய மாவோம்!

வன்முறை மீது காதல்
வளர்த்தனர் எதிரி; என்றும்
நன்முறை அற்ற போரை
நத்தினர் படையெம் வாயில்
நின்றுபோர் முரசு கொட்டி
நிலத்திலெம் மினம ழிக்கத்
தன்னுயிர், குருதி சிந்தத்
தகையிலார் அணிய மானார்!

நெருக்கடிச் சூழ லில்நம்
நிலத்தினை இனத்தைக் காக்கக்
குருதியைச் சிந்தி வென்று
கொள்கிற துய்த மான
உரிமையே விடுத லையாம்;
ஓர்பொருள் அல்ல அஃதை
அருவிலை பேசு தற்கே!
அயர்வுறா தெதிர்த்து நிற்போம்!

பேரிடர் உற்றும்; நாளும்
பெருநெருக் கடிகள் கண்டும்
நீரெனக் குருதி சிந்தி
நிற்குமெம் மக்க ளாலும்
வீரரின் ஈகத் தாலும்
விதிர்த்திடா தெதிர்த்து நின்றோம்;
பாரினில் வரலா றேயெம்
பயனுறு வழிகாட் டாகும்!

வீரரின் குருதி யாலே
விளைந்தயிவ் விடுத லைப்போர்
சீரெலாம் உற்றும் துய்தம்
சேர்த்துமீ கத்தால் தேசம்
பேருரு வாக்கம் பெற்றும்
பெட்புடை உறுதி பெற்றும்
தேரிடச் செய்தார் அந்தச்
சிற்பியர் வணங்கு வோமே!

தகைந்து –துணிந்து; ஈகம் –தியாகம்; ஈவு –அர்ப்பணிப்பு; ஈடுகாட்டு –உதாரணம்; உக்கம் –உக்கிரம்; மாற்றலர் –பகைவர்; சாலவும் –மிகவும்; மிழற்றுதல் –சொல்லுதல்; ஒல்லாது –முடியாது; அருவிலை –பேரம்; துய்தம் –புனிதம்.

அகரம் அமுதன்

மாவீரர்! -உரைப்பா! (1991)

2010-10-27T18:16:00.002+05:30

இந்தநாள் நமது வீரர்
இன்னுயிர் ஈகம் செய்து
நந்தமிழ் இனத்தைக் காக்க
நடுகற்க ளான தெண்ணிப்
புந்தியில் அவரை வைத்துப்
போற்றுவோம்! குறிக்கோ ளுக்காய்த்
தந்தனர் உயிரை அந்தத்
தகைஞரை வணங்கச் செய்வோம்!

வியர்வை,கண் ணீர்செந் நீரால்
விளைந்தயிவ் விடுத லைப்போர்
வியத்தகு குறிக்கோள் வாழ்வில்
மிகுப்பல இடுக்கண் துய்த்தும்
அயர்வுறா வீரர் கண்ட
அம்கன விவையெல் லாமும்
இயல்புறு வெளிப்பா டாக
இயைந்ததால் பிறந்த தன்றோ?

செருக்களில் எம்போல் பாரில்
தேர்வுகள்* எதிர்பா ராத
திருப்பங்கள் நிறைந்த போரைத்
திறமுடன் கண்டா ருண்டோ?
நெருக்கடி நிறைந்த தாயும்
நீண்டதும் கடின மாயும்
இருக்கிற செலவை* எங்கள்
இயக்கமே தொடரக் காண்பீர்!

ஏற்பிலா இரண்ட கத்தோ
டேமாற்றம் எம்மைச் சூழக்
கூற்றெனப் பகைவர் பாயும்
கொலைக்களம் ஒருபு றம்மும்
வேற்றவர் வன்க வர்பை
விரட்டிட மறுபு றம்மும்
ஆற்றொணா அழிவின் எல்லை
அடைந்துமே மீட்சி கண்டோம்!

அப்பெரும் புயற்கு வெற்பாய்
அசைவுறா நெஞ்சத் திட்பம்
மெய்ப்புறு தூண்க ளாக
மிசையெழுந் தியக்கம் தாங்க
இப்பெரும் போரில் நந்தம்
இணையிலா வீரர் செய்த
செப்பரும் செயலால் அன்றோ
செருவிடை நிமிர்ந்து நின்றோம்!

உளத்திடம் ஊன்று கோலாய்
உதவிட; சூழ்ச்சி வென்று
விளிவிலாக் குறிக்கோள் ஒன்றே
விடுதலைச் செலவில் வெற்றி
அளிப்பதைத் துய்த்த றிந்தே
அறைகிறேன்; செந்நீ ராலும்
விளிவொடு* துன்பத் தாலும்
விளைதலே விடுத லையாம்!

தின்னுணா தடையோர் பக்கம்
செருப்படை* இன்னோர் பக்கம்
இன்னொரு நெருக்க டிக்குள்
எமைவிட முனையும் மாணார்*
சென்றுயாழ் நாட்டைச் சூழ்ந்து
செய்தடை யாலே ஊனுக்
கென்றுமில் லாப்பஞ் சத்தை
எம்மக்கட் கியற்றி னாரே!

இடக்குகள் இயற்றி எம்மை
இடுக்கணுள்* தள்ளி நாளும்
அடக்குமு றையாம் தீயில்
அமுக்கினார்; இறப்பின் நீழல்
படுத்துறங் கிடுமெம் மையிப்
பட்டினி என்ன செய்யும்?
விடுதலைப் பசியுற் றார்க்கு
வேறொரு பசியுண் டாமோ?

அடுகளக் கருவி ஏந்தி
அமைதிசை கையுங் காட்டும்
கெடுமனச் சிங்க ளர்காள்!
கிளர்ந்தெழும் அமைதி யோடே
அடுகளப் போருக் கும்நாம்
அணியமே;* இரண்டில் எத்தை
நெடுமனத் தேற்கின் றாயோ
நேரதை நாமேற் கின்றோம்!

எழுந்தயிப் போராட் டத்தில்
எம்பக்க நயன்மை தன்னைத்
தொழுதுநாம் பார்க்குச் சொல்லத்
தோதான வாய்ப்பை நல்கி
அழுத்தமும் மேலாண் மையும்
அடக்குமுறை கட்டுப் பாடும்
ஒழிந்தநற் பேச்சுக் கென்றால்
உரை;அணிய மாக உள்ளோம்!

போர்வெறி கொண்டோ மில்லை;
போய்இனப் பகையும் உள்ளோம்;*
பாரந்த சிங்க ளர்நம்
பகைவராய்க் கருத வில்லை;
நேரவர் நாட்டை நாங்கள்
நெஞ்சினில் ஒத்தேற் கின்றோம்;
நேரவர் பண்பாட் டைநாம்
நேசித்தோம்; இடறி யற்றோம்!

அங்கவர் வாழு தல்போல்
அழகுறும் ஈழ நாட்டில்
மங்கலம் பொங்க நாமும்
வாழவே விரும்பு கின்றோம்
இங்குதே சியயி னம்மாய்
எழுவதைப் பொருத்தி டாத
சிங்களர் ஒத்தி சைவைச்
செப்பும்நாள் அமைதி தோன்றும்!

தன்படை வலியால் எம்மின்
தாயக சிக்கல் தீர்க்க
உன்னினார்;* ஒல்லா* தென்னும்
உணர்விலார்; மேலும் மேலும்
வன்கவர் பாலெம் மண்ணை
வளைக்கவே விரும்பு கின்றார்
முன்பொரு பெரும்ப டைபோல்
முகமுடை படுவா ரன்றோ?

என்னுயிர் ஈழ மக்காள்!
இப்பெரும் செலவில்* நம்மை
நண்ணிடும் சோர்வு; நாளும்
நனிசுமை நமைய ழுத்தும்
தன்குறிக் கோளை உன்னித்
தகைவுடை உறுதி யோடு
நின்றிடின் நமையெ திர்க்க
நேரெதிர்ப் படுவார் இல்லை!

நெஞ்சினில் உறுதி பூண்டு
நேரெதிர்த் தடுக ளத்தில்
துஞ்சிய மறவர் வாழும்
தூயகல் லறையொ லிக்கும்
விஞ்சரும் விடுத லைப்பா
விளம்பிடும் உறுதி தன்னை
விஞ்சிய கருவி இல்லை
விரைந்துமனத் தேற்போ மாக!

அகரம் அமுதன்

மாவீரர்! -உரைப்பா! (1990)

2010-10-21T18:11:00.003+05:30

தன்னுயிர் ஈந்தும் செந்நீர்
தனையீந்தும் ஈழம் காத்துப்
பின்னவர் பின்பற் றித்தம்
பெருமறம் நாட்டு தற்கு
மன்னிய நடுகல் ஆன
மறவரைப் போற்ற நாமும்
உன்னிய நாளே இந்த
உயர்திரு நாளாங் கண்டீர்!

இறுதியை அடைந்த வீரர்
இழப்(பு)அவர் பின்ன வர்க்கே
உறுதியை ஈந்தும் வீர
உணர்வினை ஈந்தும் நெஞ்சில்
கருதிய செயல்மு டிக்கும்
கடமையை ஈந்தும் தங்கள்
இறுதியைப் பொருளு டைத்தாய்
இயற்றி‘நல் லுயிரன்’ ஆனார்!

தன்னின விடுத லைக்காய்த்
தன்னில மீட்புக் கும்மாய்
இன்னுயிர் ஈயும் வீரர்
இணையிலாக் கொள்கை யாளர்!
தன்னலம் பேணா வாழ்வும்
தமருக்காய் வாழாப் பெட்பும்
மன்னிய அவர்தஞ் சீர்க்கு
மற்றொன்றும் ஈடே இல்லை!

விடுதலை வீரர் என்றும்
விளிவதில்; நிகழும் சாவைச்
சடுதியில் சரித்தி ரம்மாய்ச்
சமைக்கிறார்; கொள்கைத் தீயாய்
அடுத்தமா மறவர் நெஞ்சில்
அமர்கிறார்; இனத்தின் மேன்மை
எடுத்துரை சின்ன மாக
எழுகிறார்; புகழ்பே றுற்றார்!

ஓரியர் படைத னையும்
உலகினிற் பெரும்ப டையாம்
ஆரியர் படைத னையும்
அடுகளத் தெதிர்த்து நின்று
வேரிறச் செய்வ கையால்
வியத்தகு வரலா றானோம்!
சீரிய எம்தி றத்தைத்
திசையெலாம் எட்டச் செய்தோம்!

சொல்லரும் இன்னல் கண்டும்
துவண்டிடா மனத்திட் பத்தால்
மெல்லரும் வலிகள் தாங்கி
விடுதலை ஒன்றே கோளாய்
வெல்லரும் படையை வெல்ல
விரைவதும் வென்று வீழ்ந்தும்
கல்லுரு வான வீரர்
கவின்சொலச் சொற்கள் உண்டோ?

என்னுயிர்த் தோழர் எம்மின்
எழிற்றள பதிகள் நெஞ்சில்
மன்னுபோ ராளி கள்தாம்
மறப்போரில் மடிதல் கண்டே
என்னுயிர் சோரும்; தம்மின்
இன்னுயிர் ஈக ரைநாம்
உன்னவே சோரும் நெஞ்சம்
உறுதியோ டுரனும் வைகும்!

உயிரினும் மேல தாய
உயிர்த்தயிந் நாட்டை யெண்ணி
செயிர்க்களம் சென்று மாண்ட
செயல்மல்லர் தம்மை ஈன்றோர்
அயிர்த்திடா தடைவீர் பெட்பை!
அவர்மரித் தாரில் லைநம்
உயர்சரித் திரமே யானார்!
உயிர்த்தெழும் விதையும் ஆனார்!

அடிமைவி ளங்கு டைத்தே
அடல்தனித் தமிழர் காணும்
மிடிமைவி ரட்டி வாழ
விடுதலை ஒன்றே ஆறாம்!
விடிதலை வேண்டும் போரில்
விளிதலும் இயற்கை யன்றோ?
மடிந்தநம் வீரர் வீழ்ந்து
மணிவிதை ஆனார் வாழ்க!

நல்லுயிரன் –சிரஞ்சீவி; மல்லர் –வீரர்; பெட்பு –பெருமை; மிடிமை –துன்பம்.

அகரம் அமுதன்

மாவீரர்! -உரைப்பா! (1989)

2010-10-17T12:40:00.001+05:30

இன்றிந்நாள் தமிழீழ எழுச்சிக்காய்க் களங்கண்ட
எழிலார் வீரர்
பொன்றியதை நினைவுறுத்தும் புகழ்க்குரிய பொன்னாளாய்ப்
பொலியக் காண்பீர்
பொன்றுந்தன் மறவரினைப் போற்றுகின்ற மாமரபைப்
புவிமேல் நாமும்
பின்பற்றி இந்நாளைப் பெட்புமிகும் நன்னாளாய்ப்
பிறங்கச் செய்வோம்!

இன்றுவரை ஆயிரத்தை எட்டிவிட்டார் தம்முயிரை
ஈந்த வீரர்
என்பதனால் தனித்தனியே எழில்மறவர் நினைவுறுநாள்
எடுத்தல் நன்றோ?
அன்றுமுதன் முதலாய்த்தன் ஆருயிரைக் களப்போரில்
அளித்த சங்கர்
பொன்றியயிந் நாளினையே புகழ்மறவர் நாளாகப்
பொலியக் காண்போம்!

உயிரீகம் செய்தாருள் உயர்ந்தோர்யார்? தாழ்ந்தோர்யார்?
உரிமைப் போரில்
உயிரீகம் செய்தவரை ஒப்புரவாய்க் கண்டிடவும்
ஒருவர் செய்த
உயிரீகம் மேலதெனும் உரைதோன்றா வகையுறவும்
ஒருசார் பின்றி
உயரியயிந் நாளினையே உயிர்துறந்த மாவீரர்க்
கோர்ந்து கண்டோம்!

ஈரமிகு தமிழீழம் ஈன்றெடுக்கப் பிறந்திட்ட
சேய்கள் தம்முள்
வீரமிகு மாமறவர் விளைவதில்லை என்னுமுரை
விரிக்கும் வாய்கள்
சோரமிகப் பலமறவர் தோன்றிவிட்டார் தமிழீழம்
தோன்றும் காலம்
தூரமிலை எனப்பார்க்குச் சொல்லுமிந்த நன்னாளைத்
தொழுவோம் வாரீர்!

அகரம் அமுதன்

கதிர்க்கையன் ஈற்றெடுப்பு! (15)

2010-09-22T08:23:00.004+05:30

தொடரும் துயரைத் தொலைத்துத் தமிழர்
கடல்சூழ்ந்த நாட்டில் களிக்க -அடல்தனிக்
கோனே! மறவா! கொலைவாள் எடுத்து
வானே புறங்காட்ட வா! (141)

வாவந்தெம் மக்கள் வருந்தும் நிலைமாற்றித்
தாவன்று தெவ்வர் தலைகொய்து -நீவென்று
பாயும் புலிப்படையைப் பார்வியக்க நீநாட்டி
சீயம் தலைதாழச் செய்! (142)

செய்யுள்அச் சீயரின் செந்நீரைப் பாய்ச்சிநாம்
செய்வோம் விளைச்சலைச் சீர்மையுடன் -மெய்யாய்
தமிழர்க் குனைவிட்டால் தக்கதுணை இல்லை
அமிழ்கின்றார் துன்பத்தில் ஆங்கு! (143)

ஆங்குத் தவிக்கும் அருந்தமிழர்க்(கு) ஆறுதலாய்த்
தாங்கிப் பிடிக்க தலைவா!வா! –ஈங்குன்
நெடுந்தோள் நிமிர்ந்தி நெடுவான் வியக்க
அடுவெங் களத்தை அடை! (144)

அடையார்*க் கழிவை அளிக்கும் உரஞ்சேர்
படையாள் பவனே! பரிதுன்* –குடைக்கீழ்
எமையாள் பவனே! எதிரிக் கழிவை
உமையாள் மகனே! உணர்த்து! (145)

உணராப் பதர்கட்(கு) உணர்த்தல் தகுமோ?
துணவாய்* அவரைத் துணிப்பாய்* –தினவால்
திமிருமத் தீயோரைத் தீய்த்துத் தமிழர்
நிமிருமந் நாளை நினை! (146)

நின்போல் எமைக்காக்க நேரொருவன் இல்லையெமை
முன்போல் நலங்காக்க முன்னேவா! –பின்போய்ப்
பகைவர் அழிய படைதோற்று விப்பாய்;
இகல்*நீக்கும் நீயெம் இறை! (147)

இகல் –பகைவர்.

இறைஞ்சி* வருவோர்க்(கு) இனிதருளும் வேந்தே!
நிறைகெட்ட காடையரை நீக்கி –அறைமுரசுக்
கையா! எனையாள் அரசே! எழிற்கதிர்க்
கையா! கடைக்கண்ணைக் காட்டு! (148)

காட்டிக் கொடுத்த கயவன் அருளன்*
நீட்டி உறங்கிடல் ஞாயமோ? –நாட்டிலவன்
வீணாய் உலவுவதும் வேண்டாமே! கொன்றொழித்துக்
காணாப் பிணமாக்கல் காப்பு! (149)

காப்பிட்டுக் காடையரைக் காலன் இடனனுப்பக்
கூப்பிட்டோம் எங்கள் குறைதீர்ப்பாய் –கூப்பிட்டோர்க்(கு)
ஏவலாள் ஆனவனே! எல்லாளா! தாள்பணிந்தோம்
காவலாய் வந்தெம்மைக் கா! (150)

அடையார் –பகைவர்; பரிது –பெரிது; துணவு –விரைவு; துணித்தல் –வெட்டுதல்; இறைஞ்சுதல் –வணங்குதல்; அருளன் –கருணா.

அகரம் அமுதன்

கதிர்க்கையன் ஈற்றெடுப்பு! (14)

2010-09-18T16:22:00.004+05:30

சிரித்த பிழைப்புப் பிழைப்போர்* சிதற
விரையும் கரும்புலியர் வீச்சில் –எரியும்
அனுரா தபுரம்* அழியத் துடித்தார்
இனியாது செய்குவம் என்று! (131)

என்று முடியுமோ ஈழத் தவர்துயர்
அன்று பிறக்கும் அமைதியிதை –நன்குணராச்
சிங்களர்க்கே நானிலமும் சென்றுதவ போர்க்களத்தில்
எங்களவர்க்(கு) உற்றதுணை யார்? (132)

யாதோர் துணையுமின்றி ஆங்குநீ போர்செய்யத்
தீதோர் வடிவான சிங்களர் –சூதோர்ந்(து)
உனைக்கொன்ற தாய்ச்சொல்லி ஊருக்(கு) உரைத்தார்
நினைக்கப் பொறுக்குதில்லை நெஞ்சு! (133)

நெஞ்சில் வலியோடும் நீர்வழியும் கண்ணோடும்
எஞ்சிய எம்மவரை ஈழத்தே –கஞ்சியின்றி
முள்வேலி யுள்ளடைத்து மூடர் கொலைபுரிந்தார்
அல்லும் பகலோடும் அங்கு! (134)

அங்கெமது மக்கள் அடையும் துயர்சொன்னால்
பொங்கும் விழிநீர் புனலாறாய் -சிங்களர்
போலப்போர்க் குற்றம் புரிந்தார் எவருமில்லை
காலக் கணக்கேட்டில் காண்! (135)

காணாக் கொடுமைபல கண்முன்னே கண்டுமதைக்
காணா துலகம் கடப்பதனால் -நாணாத
நாயனைய காடையர்கள் நாளும் நடத்துகிறார்
தீய செயல்பலவுந் தேர்ந்து! (136)

தேரலரால் எம்மவர் செத்து மடிகின்றார்
நேரிழையார் கற்பிழந்து நிற்கின்றார் -சீரிழந்த
சிங்களப் பேடிகளால் செந்தமிழச் சேய்களும்
தங்கள் உயிர்விட்டார் தாழ்ந்து! (137)

தாழம் இழந்து தவிக்கும் தமிழரைச்
சூழும் இடுக்கண் சொலவொணுமோ? -ஆழம்
தெரியாமல் கால்விட்ட சிங்களர்தஞ் சென்னி
அரியா தகல்வதோ அன்று! (138)

அன்மைச் செயல்செய் தகங்குளிரும் தெவ்வரால்
புன்மை அடைந்து புழுங்குகிறார் -இன்னமும்
எத்தனை தீத்துயர் எம்மவர் காண்பதோ?
புத்தனே கொஞ்சம் புகல்! (139)

புகலிகளாய் ஓரியர் போந்தவந் நாள்தொட்டு
அகதிகளாய் எந்தமிழர் ஆங்கே -நுகர்துயரம்
கொஞ்சமோ? இந்தக் கொடுமைகளைக் காண்பார்கண்
துஞ்சுமோ கீழிமை தொட்டு! (140)

சிரித்த பிழைப்புப் பிழைப்போர் –எள்ளத்தக்க வாழ்க்கை வாழ்கின்ற சிங்களர்; அனுராத புரம் –அனுராதபுரம் வான்படைத் தளத்தைக் குறிக்கிறது.

அகரம் அமுதன்